পাঞ্জাৱ নেচনেল বেংকত ধনৰ ব্যাপক খেলিমেলিৰ অভিযোগ

মদ্যপান কৰি কাৰ্যালয়লৈ আহে বৰমাস্থিত পাঞ্জাৱ নেচনেল বেংকৰ কৰ্মচাৰী,ফলত প্ৰায়ে বেংকটোত ধনৰ ব্যাপক খেলিমেলি হোৱাৰ অভিযোগ উত্থাপন গ্ৰাহকৰ ৷

বৰমা,১৭ অক্টোবৰ:ধনৰ খেলিমেলিৰ বাবে বাতৰিৰ শিৰোনাম দখল কৰিছে বৰমাস্থিত পাঞ্জাৱ নেচনেল বেংকৰ শাখাই। তথ্য অনুসৰি চলিত বৰ্ষৰ ১৫ অক্টোবৰত এগৰাকী মহিলাই বেংকত জমা কৰিবলৈ গৈছিল 5000 টকা। পিচে টকা 5000ৰ সলনি মহিলাগৰাকীয়ে ভুলতে কেচিয়াৰক দিয়ে 10000 টকা ৷ মহিলাগৰাকীৰ অভিযোগ অনুসৰি কেচিয়াৰজনে জমা শ্লীপত 5000 টকা লিখি স্বাক্ষৰ কৰি 10000 টকাই জমা ৰাখে ৷ বৃহস্পতিবাৰে গ্ৰাহক গৰাকীয়ে কথাটো জানিবলৈ পায় বেংকলৈ গৈ বেংক পৰিচালক আৰু কেচিয়াৰ গৰাকীক সমগ্ৰ ঘটনাৰ বিষয়ে অৱগত কৰে যদিও এই কথা নুই কৰে বিষয়া দুগৰাকীয়ে। পিচত ঘটনাস্থলীত সাংবাদিক উপস্থিত হোৱাত পৰিচালক গৰাকীয়ে চিচি টিভিৰ ফুটেজ দেখুৱাত গোটেই ঘটনাটো পৰিষ্কাৰ হৈ উঠে ।

কেচিয়াৰ গৰাকীয়ে গ্ৰাহকৰ ওচৰত ভুল স্বীকাৰ কৰি 5000 টকা উভতাই দিয়ে গ্ৰাহক গৰাকীক। গ্ৰাহকগৰাকীৰ অভিযোগ মতে,প্ৰতিদিনে মদ্যপান কৰি কাৰ্যালয়লৈ আহে উক্ত কেচিয়াৰজন। ফলত গ্ৰাহকসকলে প্ৰায়ে এনে ধৰণৰ সমস্যাৰ সন্মুখীন হৈ হ'বলগীয়া হৈ আহিছে। ইয়াৰ পূৰ্বে কেবাবাৰো অনুৰূপ ঘটনা সংঘটিত হোৱা বুলিও কয় গ্ৰাহক গৰাকীয়ে। তাৰ পিচতো উৰ্দ্ধতন কৰ্তৃপক্ষই কোনো ধৰণৰ ব্যৱস্থা গ্ৰহণ নকৰাত আশ্বৰ্য প্ৰকাশ কৰিছে সচেতন ৰাইজে।