বাক্সা, 19 আগষ্ট :বিটিচিত ইউ পি পি এল দলে চৰকাৰ গঠন কৰিব তাত কোনো সন্দেহ নাই । 24 ৰ পৰা 25 খন আসন লাভ কৰি ইউ পি পি এল দলে দখল কৰিব বিটিচি ৷ এই মন্তব্য ইউ পি পি এলৰ কেন্দ্ৰীয় সমিতিৰ উপ-সভাপতি হিৰণ্য চৌধুৰীৰ । বুধবাৰে তামুলপুৰ প্ৰেছ ক্লাৱত অনুষ্ঠিত এক সংবাদমেল সম্বোধন কৰি এই মন্তব্য প্ৰদান কেন্দ্ৰীয় সমিতিৰ উপ-সভাপতি গৰাকীৰ ।
ইয়াৰ উপৰিও, বিপিএফ, এন ডি এফ বি গোটৰ, জিএছ পিকে আদি কৰি বিটিচিৰ কেইটামান ৰাজনৈতিক দলে ইউ পি পি এল দলৰ বিৰুদ্ধে ষড়যন্ত্ৰমুলক বক্তব্য দাঙি ধৰি বিভিন্ন জাতি-জনগোষ্ঠীৰ মাজত বিভ্ৰান্ত সৃষ্টি কৰা পৰিলক্ষিত হৈছে । সংবাদমেলত আকৌ কয় যে, বিৰোধী দল সমূহে ইউ পি পি এল দলে চৰকাৰ গঠন কৰিলে বিটিচিত বসবাস কৰা আন জাতি-জনগোষ্ঠীৰ লোক সকলে টালি-টোপোলা বান্ধি বিটিচি এৰি যাব লগা হ'ব ৷ আনকি, মাটি-বাৰীৰ ক্ষেত্ৰতো সমস্যাৰ সৃষ্টি হ'ব বুলি বক্তব্য প্ৰদান কৰি জাতি-জনগোষ্ঠীৰ মাজত আতংকময় পৰিৱেশ সৃষ্টি কৰি আছে ।
আনহাতে, ইউ পি পিএলৰ নেতৃত্বত বিটিচিত গঠন হলে বিটিচিত বসবাস কৰা সকলো জাতি-জনগোষ্ঠীৰ লোকে সম-অধিকাৰ আৰু সম-মৰ্যদা লাভ কৰিব আৰু নিৰাপত্তা সুনিশ্চিত হ'ব । বিটিচিত ইউ পি পি এল দলে পৰিষদ গঠন কৰিলে বিপিএফৰ 17 বছৰীয়া শাসনৰ কালৰ প্ৰতিটো বিভাগত হোৱা ভ্ৰষ্টাচাৰ দুৰ্নীতিৰ বিৰুদ্ধে তদন্ত কৰা হ'ব আৰু দোষীক উপযুক্ত শাস্তি দিয়া হ'ব । ইউ পি পি এল উপ-সভাপতি গৰাকীয়ে সংবাদমেলত এই বুলি কয় যে, বিপিএফ দলে 17 বছৰে কিছুমান সমস্যা সন্দৰ্ভত নিৰৱ ভূমিকা গ্ৰহণ কৰি আহিছে । মাটি-বাৰী পঞ্জীয়ন কৰাৰ ক্ষেত্ৰত এই কাম সমূহ কোকৰাঝাৰ কাৰ্যালয়তে সীমাবদ্ধ ৰাখি ৰাইজক হাৰাশাস্তি কৰি আহিছে বুলি সংবাদমেলত জনায় ।