বাক্সাত নৱ শৰণীয়াৰ সমৰ্থকক আক্ৰমণঃ অভিযুক্তৰ বিৰুদ্ধে গোচৰ নলয় আৰক্ষীয়ে!

বাক্সাৰ নয়াবস্তিত আক্ৰমণৰ বলি হৈছে সাংসদ নৱ কুমাৰ শৰণীয়াৰ সমৰ্থক ৷ সাংসদগৰাকীৰ সভাত অংশগ্ৰহন কৰাৰ বাবে যুৱ বিপিএফৰ সদস্যই এজন যুৱকক মাৰপিট কৰাৰ অভিযোগ উত্থাপন হৈছে ৷

বাক্সা, 20 ছেপ্টেম্বৰঃ জানিব পৰা মতে বিগত কিছুদিন পূৰ্ৱে সাংসদ নৱ কুমাৰ শৰণীয়াই এক কাৰ্যসুচী লৈ উপস্থিত হৈছিল নয়াবস্তিত ৷ ৰাইজৰ লগতে নয়াবস্তিৰ নিপন দাস নামৰ এইগৰাকী যুৱকেও ভাগ লৈছিল সাংসদগৰাকীৰ কাৰ্যসুচীত৷ পিচে নৱ কুমাৰ শৰণীয়াৰ কাৰ্যসূচীত যোৱাটোৱে অপৰাধ হ'ল নিপন দাসৰ ৷ অভিযোগ অনুসৰি, বুধবাৰে নয়াবস্তিৰ কেইজনমান যুৱ বিপিএফৰ সদস্যই নিপন দাসক নয়াবস্তি চ'ক বজাৰত আগুৰি ধৰি বিভিন্ন প্ৰশ্ন কৰাৰ লগতে মাৰপিট কৰে ৷ যুৱকজনে প্ৰাণৰ মমতাত দৌৰি পলাবলৈ চেষ্টা কৰে যদিও পিচে-পিচে খেদি গৈ প্ৰহাৰ কৰে বিপিএফৰ সদস্যসকলে ৷ ফলত গুৰুতৰভাৱে আহত হয় নিপন দাস ৷

ইপিনে, বৃহস্পতিবাৰে ঘটনা সন্দৰ্ভত নিপন দাসে বৰবৰী আৰক্ষী থানাত যুৱ বিপিএফৰ সদস্য কেইগৰাকীৰ বিৰুদ্ধে এজাহাৰ দিবলৈ থানাত উপস্থিত হয় যদিও ৰহস্যজনক কাৰণত থানাৰ বিষয়াগৰাকীয়ে এজাহাৰ গ্ৰহন নকৰিলে ৷ যাৰবাবে এতিয়া শংকিত হৈ পৰিছে ভূক্তভোগী নিপন ৷ এনে এক পৰিস্থিতিত এজাহাৰ লবলৈ অস্বীকাৰ কৰা আৰক্ষী বিষয়াগৰাকীৰ বিৰুদ্ধে সোঁচ্চাৰ হৈ পৰিছে অবড়ো সুৰক্ষা সমিতি ৷