বাক্সাত নিৰ্বাচনকেন্দ্ৰিক হিংসাঃ গুৰুতৰভাৱে আহত গাঁওবুঢ়া

লোকসভা নিৰ্বাচনক লৈ বিভিন্ন ৰাজনৈতিক দলে ৰণনীতি প্ৰস্তুত কৰি থকাৰ সময়তে বাক্সাত সংঘটিত হৈছে নিৰ্বাচনী হিংসা ৷

বাক্সা, 25 মাৰ্চঃ বাক্সাত নিৰ্বাচন কেন্দ্ৰিক হিংসাত পতিত হোৱাৰ পাচতো আৰক্ষী প্ৰশাসনে বিশেষ গুৰুত্ব নিদিয়াত শংকিত হৈ পৰিছে এটি পৰিয়াল ৷ উল্লেখ্য যে, লোকসভা নিৰ্বাচনক লৈ বিভিন্ন ৰাজনৈতিক দলে ৰণনীতি প্ৰস্তুত কৰি থকাৰ সময়তে বাক্সাত সংঘটিত হৈছিল নিৰ্বাচনী হিংসা ৷ দুৰ্বৃত্তৰ আক্ৰমণত আহত হৈছিল গাঁওবুঢ়া ৰমেশ চন্দ্ৰ মুছাহাৰী ৷ সভা শেষ কৰি ঘৰলৈ আহি থকাৰ সময়তে ৰাজপথত তেওঁক পিছফালৰ পৰা দুৰ্বৃত্তই চোকা অস্ত্ৰৰে আক্ৰমণকৰে আৰু লাঠি, ভুকুৰে মুখমণ্ডলত আক্ৰমণকৰে ৷ পাছত তেজেৰে তুমুৰলি হৈ পৰি থকা গাঁওবুঢ়া গৰাকীক এগৰাকী বাটৰুৱাই প্ৰত্যক্ষ কৰি ঘৰত খবৰ দিয়ে ৷ পিচত ঘটনাস্থলীত পৰিয়ালৰ লোক উপস্থিত হৈ চিকিৎসালয়ত ভৰ্তি কৰে ৷ পিছদিনা অস্ত্ৰোপচাৰ কৰি গাঁওবুঢ়াজনক ঘৰলৈ আনি ২২ মাৰ্চত বৰবৰী আৰক্ষী থানাত ঘটনা সন্দৰ্ভত এটা গোচৰ দিয়ে ৷ আৰক্ষীয়ে গোচৰটো সম্পৰ্কত এজন ব্যক্তিক আটক কৰি পিছ মুহূৰ্ততে মুকলি কৰি দিয়াত ক্ষোভত ফাটি পৰিছে পৰিয়ালটো ৷ যাৰ বাবে শংকিত পৰিয়ালটোৱে উচিত ন্যায় বিচাৰিছে আৰক্ষী প্ৰশাসনৰ পৰা ৷