বাক্সা, 26 ডিচেম্বৰ :শেহতীয়াকৈ বাক্সাৰ মুছলপুৰৰ জিলা কেন্দ্ৰৰ সভাকক্ষত ধঁপাত নিয়ন্ত্ৰণৰ কাৰণে ল'বলগীয়া সাৱধানতাৰ বিষয় সন্দৰ্ভত অনুষ্ঠিত হয় এক বিশেষ কৰ্মশালা (Awarness programme against uses of Tobacco) ৷ এই কৰ্মশালাত ধঁপাত সেৱনৰ ফলত হোৱা কাৰকসমূহৰ বিষয়ত আলোচনা কৰা হয় ৷
কৰ্মশালাত উপস্থিত থাকে ৰাজ্যিক ধঁপাত নিয়ন্ত্ৰণ ব’ৰ্ডৰ নডেল বিষয়া ডাঃ অৰুন্ধতী ডেকা ৷ কৰ্মশালাত নডেল বিষয়াগৰাকীয়ে তথ্যচিত্ৰৰ যোগেদি ধঁপাত সেৱনৰ পৰা হ'ব পৰা কৰ্কট ৰোগৰ সম্পৰ্কে বিশদভাৱে আলোচনা কৰে ৷
তেওঁ জানিবলৈ দিয়ে যে, ধঁপাত সেৱনৰ ফলত ভাৰতবৰ্ষত বছৰত কমেও ৮ লাখ লোকে নিজৰ জীৱন অকালতে হেৰুৱাবলগীয়া হয় ৷ এনে ভয়াৱহ ৰোগ প্ৰতিৰোধ কৰিবৰ বাবে সকলোৰে মাজত সজাগতা সৃষ্টিৰ প্ৰয়োজন ৷ ধঁপাত সেৱনৰ ফলত হ’ব পৰা মাৰাত্মক কৰ্কট ৰোগক প্ৰতিৰোধ কৰিবলৈ হ'লে প্ৰথমে এই দ্ৰব্য সেৱনকাৰী লোকসকলৰ মাজত সজাগতা সৃষ্টি কৰা, দ্বিতীয়তে ৰাজহুৱা স্থান বা শিক্ষা প্ৰতিষ্ঠানসমূহ ধঁপাত মুক্ত কৰাৰ প্ৰয়োজন বুলি সদৰী কৰে ৷