বৰমা, 20 অক্টোবৰঃশক্তি বিভাগৰ গাফিলতিৰ বাবে পুনৰ প্ৰাণ গ'ল এগৰাকী শ্ৰমিকৰ ৷ বাক্সা জিলাত শনিবাৰে নিশাৰ ভাগত সংঘটিত হয় এই ঘটনা ৷ জিলাখনৰ বৰমাৰ পূব চ'কত সংঘটিত ঘটনাত শোকাৱহভাৱে প্ৰাণ হেৰুৱায় এগৰাকী সাধাৰণ শ্ৰমিকে ৷ নিহত শ্ৰমিকজন বৰবৰী আৰক্ষী চকীৰ অন্তৰ্গত পলাশী গাঁৱৰ বৰুণ দাসৰ পুত্ৰ সত্যজিত দাস বুলি জানিব পৰা গৈছে ৷
ঘটনা অনুসৰি, বৰমাৰ পূব চ'কত শিল বালি কঢ়িওৱা ট্ৰাকত কৰ্মৰত সত্যজিত দাসে অসাৱধানবশত উচ্চক্ষমতা সম্পন্ন বিদ্যুৎ পৰিবাহী তাঁৰৰ সংস্পৰ্শলৈ আহে ৷ ফলত ঘটনাস্থলীতে নিহত হয় শ্ৰমিক সত্যজিত দাস ৷ সেইস্থানত থকা বিদ্যুৎ পৰিবাহী তাঁৰডাল বিপদজ্জনকভাৱে তললৈ হালি আছিল আৰু তাৰ বাবেই সংঘটিত হয় শোকাৱহ ঘটনাটো ৷
পৰৱৰ্তী সময়ত ঘটনাস্থলীত উপস্থিত লোকে সত্যজিতক চিকিৎসালয়লৈ নিয়ে যদিও চিকিৎসকে মৃত ঘোষণা কৰে ৷ আনহাতে ঘটনাক লৈ শ্ৰমিকজনৰ পৰিয়ালৰ লোকে এয়া এক পৰিকল্পিত হত্যাকাণ্ড বুলি দাবী কৰিছে ৷ কিয়নো ঘটনা সংঘটিত হোৱাৰ পিচৰে পৰাই চিকিৎসালয়লৈ নিয়াককৈ সমগ্ৰ ঘটনাটো পৰিয়ালৰ লোকক অৱগত কৰাৰ পৰা বিৰত আছিল ট্ৰাকখনৰ গৰাকীয়ে ৷ আনহাতে দুখীয়া পৰিয়ালটোৰ একমাত্ৰ উপাৰ্জনকাৰী 23 বছৰীয়া শ্ৰমিকজনৰ মৃত্যুক সাধাৰণভাৱে ল'ব পৰা নাই গাঁৱবাসীয়ে ৷ ঘটনাৰ উচিত তদন্ত দাবী কৰাৰ লগতে পৰিয়ালটোক ক্ষতিপূৰণ দিয়াৰো দাবী উত্থাপন কৰিছে গাঁৱবাসীয়ে ৷