বাক্সাত চুৰি বাইকসহ আটক দুই দুধৰ্ষ বাইক চোৰ

এশ গৰু খালে বাঘৰো মৰণ : ৰঙাঘৰত বাইক চোৰ

বাক্সা, ১৯ ফেব্ৰুৱাৰী: ৰাজ্যত পুনৰ সক্ৰিয় গাড়ী চুৰি চক্ৰ। সোমবাৰে নিশা বাক্সা জিলাৰ নিকাছি আৰক্ষী চকীৰ অন্তৰ্গত নাৰায়ণপুৰত আৰক্ষীয়ে চুৰি বাইকসহ দুই দুৰ্ধৰ্ষ বাইক চোৰ আটক কৰে।

প্ৰাপ্ত খবৰ অনুসৰি ধৃত চোৰ দুজনে নিশা জিলাখনৰ শিমলা আৰক্ষী থানাৰ অন্তৰ্গত পানবাৰী গাঁৱৰ ৰাতুল মুছাহাৰীৰ নতুন গ্লেমাৰ বাইকখন চুৰি কৰি আনিছিল । পৰৱৰ্তি সময়ত ৰাতুল মুছাহাৰীয়ে বাইকখন ডুমুনী অঞ্চলত থকাৰ সম্ভেদ পাই বিচাৰ খোচাৰ কৰি থকাৰ সময়তে বাইক লৈ ডুমুনীৰ পৰা পলায়ন কৰাৰ চেষ্টা কৰে চোৰ কেইজনে । কিন্তু ৰাইজৰ সহযোগত বাইকসহ চোৰ দুজনক কৰায়ত্ত কৰিবলৈ সক্ষম হয় যদিও এটা চোৰ পলায়ন কৰিবলৈ সক্ষম হয় ৷

অৱশ্যে চুৰি বাইক সহ কৰায়ত্ব কৰা দুই চোৰক একাংশ ৰাইজে উত্তম মধ্যম দি থকাৰ সময়তে নিকাছি আৰক্ষীয়ে উন্মক্ত জনতাৰ ৰোষৰ পৰা উদ্ধাৰ কৰি চোৰ দুজনক নিজৰ জিম্মাত লয় ৷ ধৃত দুৰ্ধৰ্ষ বাইক চোৰ দুটা ক্ৰমে বৰবৰীৰ হিৰঞ্জয় বড়ো আৰু লামিদাৰাৰ ৰতন পাটগিৰি ৷ আনহাতে ঘটনাস্থলীৰ পৰা কৌশলেৰে পলায়ন কৰা চোৰটো মুছলপুৰৰ পবিত্ৰ হালৈ বুলি জানিব পৰা গৈছে । উল্লখ্য যে ধৃত দুই বাইক চোৰে দীৰ্ঘদিন ধৰি সহযোগীৰ সৈতে নামনি অসমৰ বিভিন্ন প্ৰান্তৰ লগতে বিশেষকৈ বাক্সা জিলাৰ বিভিন্ন ঠাইৰ পৰা বিগত সময়ত কেবাখনো বাইক চুৰি কৰি বহি:ৰাজ্যত বিক্ৰী কৰি আহিছিল ।