বিশ্ব চেম্পিয়ন হ’ল ইংলেণ্ড, কিন্তু সমালোচনাৰ সন্মুখীন আই চি চি

ক্ৰিকেটৰ মক্কা নামে খ্যাত লৰ্ডছ ষ্টেডিয়ামত অনুষ্ঠিত হৈছিল বিশ্বকাপৰ চূড়ান্ত মেচ ৷ শ্বাসৰুদ্ধকাৰী মেচখনত অৱশেষত জয়ী হয় ইংলেণ্ড ৷ ছুপাৰ অভাৰতো ড্ৰ’ কৰি পৰাজয়ৰ সন্মুখীন হয় নিউজিলেণ্ড ৷

স্পৰ্টছ ডেস্ক, 14 জুলাইঃ আই চি চিৰ নিয়মক লৈ সৰ্বত্ৰে চৰ্চা ৷ বাউণ্ডেৰী নিয়মৰ অধীনত চেম্পিয়ন দল নিৰ্ণয় কৰা নিয়মক সমালোচনা বহু ক্ৰিকেট অনুৰাগীৰ ৷ আনহাতে এই নিয়ম সন্দৰ্ভত বহু খেলুৱৈ, বলিউডৰ তাৰকাই প্ৰতিক্ৰিয়া প্ৰকাশ কৰে ৷

প্ৰথমবাৰৰ আই চি চি আন্তঃৰাষ্ট্ৰীয় এদিনীয়া ক্ৰিকেটৰ বিশ্বকাপৰ খিতাপ লাভ কৰিবলৈ সক্ষম হয় ইংলেণ্ডে ৷ টছত জয়ী হৈ প্ৰথমে বেটিঙ কৰি নিউজিলেণ্ডে ইংলেণ্ডক জয়ৰ বাবে লক্ষ্য বান্ধি দিছিল 242 ৰান ৷ নিউজিলেণ্ডে নিৰ্ধাৰিত 50 অভাৰত 8 টা উইকেট হেৰুৱাই সংগ্ৰহ কৰিছিল 241 ৰান ৷ নিউজিলেণ্ডৰ হৈ হেনৰী নিকল্ছে সৰ্বাধিক 55 ৰান কৰাৰ বিপৰীতে টম লেথামে 47, কেন উলিমায়চনে 30, মাৰ্টিন গুপটিলে 19, জিমী নীছামে 19, ৰছ টেইলৰে 15 ৰানৰ বৰঙণি আগবঢ়ায় ৷ ইংলেণ্ডৰ হৈ ক্ৰীছ ৱক্ছে 9 অভাৰত 37 ৰান দি 3 টা আৰু লিয়াম প্লাংকিটে 10 অভাৰত 42 ৰান দি 3 টা উইকেট দখল কৰে ৷ আনহাতে জফ্ৰা আৰ্ছাৰ, মাৰ্ক ৱুডে 1 টা কৈ উইকেট লাভ কৰে ৷

ইয়াৰ প্ৰত্যুত্তৰত ইংলেণ্ডেও বেন ষ্টকছৰ অপৰাজিত 84 ৰানৰ বিনিময়ত আটাইকেইটা উইকেট হেৰুৱাই 241 ৰান কৰিবলৈ সক্ষম হয় ৷ ইয়াৰ পাচত ছুপাৰ অভাৰত ইংলেণ্ডে প্ৰথমে বেটিং কৰি 15 ৰানৰ লক্ষ্য় বান্ধি দিয়ে নিউজিলেণ্ডক ৷ কিন্তু ছুপাৰ অভাৰতো মেচখন ড্ৰ’ হোৱাত মেচখনত অত্যাধিক বাউণ্ডেৰী কোৱাবাৰ বাবেই জয়ী নিৰ্ধাৰণ কৰা হয় ইংলেণ্ডক ৷