স্পৰ্টছ ডেস্ক, ৪ আগষ্ট: টকিঅ' অলিম্পিকত ৰাছিয়ান অলিম্পিক কমিটীৰ ভেলেৰিয়া ক'বলোভা(Valeria Koblova)ৰ হাতত পৰাজিত হ'ল ভাৰতৰ মল্লযোদ্ধা অংশু মালিক(Anshu Malik) । মল্লযুঁজৰ ৰেপেচেজ ৰাউণ্ডত মহিলাৰ ফ্ৰীষ্টাইলৰ ৫৭ কিলোগ্ৰাম শাখাত যুঁজ দিছিল ভাৰতীয় মল্লযোদ্ধাগৰাকীয়ে । আৰম্ভণিতেই অংশু মালিকে কেইবাটাও কাৰিকৰী পইণ্ট হেৰুৱাইছিল । প্ৰথম সময়ছোৱাত প্ৰতিদ্বন্দী ভেলেৰিয়া ক'বলোভাতকৈ পিছ পৰি থাকিবলগীয়া হৈছিল অংশু মালিক ।
ইয়াৰ পূৰ্বে, প্ৰি-কোৱাৰ্টাৰ ফাইনেলত মহিলাৰ ৫৭ কিলোগ্ৰাম শাখাত ইৰিনা কুৰাচকিনাৰ হাতত তেওঁ পৰাস্ত হৈছিল । বেলাৰুছৰ ইৰিনাই প্ৰি-কোৱাৰ্টাৰ ফাইনেলত অংশুক পৰাস্ত কৰিছিল আৰু তেওঁ কোৱাৰ্টাৰ ফাইনেলত ৰাছিয়ান অলিম্পিক কমিটীৰ (আৰঅচি) ভেলেৰিয়া ক'বলোভাৰ বিৰুদ্ধে যুঁজি জয়ী হৈছিল । তাৰ পিছত তেওঁ ছেমি ফাইনেলত বুলগেৰিয়াৰ এভেলিনা নিকোলোভাক পৰাস্ত কৰে । ইৰিনাৰ ফাইনেলত প্ৰৱেশে অংশু আৰু ভেলেৰিয়া দুয়োকে ব্ৰঞ্জৰ পদকৰ বাবে ছেমি ফাইনেলত পৰাজিত হোৱা এভেলিনাৰ সৈতে যুঁজ দিয়াৰ সুযোগ দিয়ে ।