Tokyo Olympics: সোণৰ পদক জয়ৰ সম্ভাৱনা মীৰাবাই চানুৰ !

ড'পিং টেষ্টৰ সন্মুখীন হ'ব টকিঅ' অলিম্পিক(Tokyo Olympics)ৰ ভাৰোত্তোলনত সোণৰ পদক অৰ্জন কৰিবলৈ সক্ষম হোৱা চীনৰ ঝিহুই হৌ(Zhihui Hou) । যদি এই পৰীক্ষাত তেওঁৰ বিৰুদ্ধে উত্থাপিত অভিযোগ সত্য প্ৰমাণিত হয় আৰু খেলৰ বাবে অযোগ্য বিবেচিত হয়, তেন্তে কি হ'ব সমিতিৰ পৰৱৰ্তী পদক্ষেপ ?

স্প’ৰ্টছ ডেস্ক, ২৬ জুলাই: শনিবাৰে টকিঅ' অলিম্পিক(Tokyo Olympics)ৰ ভাৰোত্তোলন প্ৰতিযোগিতাত মুঠ ২১০ কিল’গ্ৰামৰ ভাৰ উত্তোলন কৰি এক নতুন অভিলেখ ৰচি স্বৰ্ণ পদক অৰ্জন কৰিছিল চীনৰ ঝিহুই হৌ(Zhihui Hou)ৱে । কিন্তু স্বৰ্ণ পদক বিজয়ৰ আনন্দৰ মাজতে চৰ্চালৈ আহিছে খেলুৱৈগৰাকী । এক বিশেষ সূত্ৰই জানিবলৈ দিয়া মতে, চীনৰ ঝিহুই হৌ(Zhihui Hou) ড'পিং টেষ্টৰ সন্মুখীন হ'ব লাগিব । ড'পিং বিৰোধী কৰ্তৃপক্ষই কৰা পৰীক্ষাত উত্থাপিত অভিযোগ সত্য প্ৰমাণিত হ’লে একেখন প্ৰতিযোগিতাতে ৰূপৰ পদক বিজয়ী ভাৰতৰ মীৰাবাই চানুক প্ৰদান কৰা হ'ব সোণৰ পদক ।

প্ৰতিযোগিতাৰ নিয়ম অনুসৰি, যদি কোনো খেলুৱৈ ড'পিং পৰীক্ষাত দোষী হিচাপে প্ৰমাণিত হয়, তেন্তে ৰূপৰ পদক জয় কৰা খেলুৱৈগৰাকীক সোণৰ পদকটো প্ৰদান কৰা হয় । সূত্ৰটোৱে জনোৱা মতে, ঝিহুই হৌক এতিয়াও টকিঅ'ত থাকিবলৈ কোৱা হৈছে । শীঘ্ৰেই তেওঁৰ ড'পিং টেষ্ট সম্পন্ন হ'ব । উল্লেখ্য যে, টকিঅ'ৰ আন্তঃৰাষ্ট্ৰীয় মঞ্চত মহিলাৰ ৪৯ কিল’গ্ৰাম শাখাত মীৰাবাই চানুৱে ৰূপৰ পদক অৰ্জন কৰি ভাৰতবাসীক গৌৰৱান্বিত কৰিছিল ।

লগতে পঢ়ক: টকিঅ’ অলিম্পিকৰ চতুৰ্থ দিন: অভিষেক মেছত জয়লাভ ফেঞ্চাৰ ভাৱানী দেৱীৰ

চানুৱে প্ৰতিযোগিতাত তেওঁৰ চাৰিটা সফল প্ৰচেষ্টাৰ সময়ত মুঠ ২০২ কিল’গ্ৰাম (snatch ত ৮৭ কিল’গ্ৰাম আৰু clean and jerk ত ১১৫ কিল’গ্ৰাম) উত্তোলন কৰিছিল । ইণ্ডোনেছিয়াৰ ৱিণ্ডি কেণ্টিকা আইছাই মুঠ ১৯৪ কিল’গ্ৰামৰ সৈতে ব্ৰঞ্জৰ পদক লাভ কৰিছিল । উল্লেখ্য যে, টকিঅ' অলিম্পিকত ৰূপৰ পদক অৰ্জন কৰাৰ পাছতে অলিম্পিকত পদক অৰ্জন কৰা দ্বিতীয় ভাৰতীয় ভাৰোত্তোলক হিচাপে পৰিগণিত হয় মীৰাবাই চানু ।

ইয়াৰ পূৰ্বে ২০০০ চনত ছিডনী এছিয়ান গেমছত কৰ্ণম মালেশ্বৰীয়ে ৬৯ কিল’গ্ৰাম শাখাত ব্ৰঞ্জৰ পদক লাভ কৰিছিল । ভাৰোত্তোলক মীৰাবাই চানুৰ ৰূপৰ পদক অৰ্জনক লৈ আনন্দিত হৈ পৰিছে গৃহৰাজ্য মণিপুৰৰ লগতে সমগ্ৰ দেশবাসী । এতিয়া খেলুৱৈগৰাকীৰ সোণৰ পদক জয়ৰ সম্ভাৱনাই অধিক আনন্দিত কৰিছে দেশৰ ক্ৰীড়াপ্ৰেমীসকলক ৷