স্পৰ্টছ ডেস্ক, 17 জুনঃ টেনিছ ক্ৰীড়াজগতৰ বাবে ডাঙৰ খবৰ । বন্ধ দুৱাৰৰ মাজত অনুষ্ঠিত কৰা হ'ব ইউএছ অ'পেন টেনিছ প্ৰতিযোগিতা । নিউয়ৰ্ক গভৰ্ণৰ এণ্ড্ৰিও কুওমোয়ে ঘোষণা কৰিছে এই কথা । অহা 31 আগষ্টৰ পৰা 13 চেপ্তেম্বৰলৈ অনুষ্ঠিত হ'ব এই প্ৰতিযোগিতা ।
কুওমোয়ে লগতে জনায়,আমেৰিকা যুক্তৰাষ্ট্ৰ টেনিছ সংস্থাৰ (USTA) দ্বাৰা গ্ৰহণ কৰা হ'ব খেলুৱৈৰ সুৰক্ষাৰ সকলো যাৱতীয় ব্যৱস্থা । লগতে প্ৰতিযোগিতা নিয়াৰিকৈ পৰিচালনা কৰাৰ বাবে সকলোৰে বলিষ্ঠ ভাৱে পৰীক্ষা কৰা হ'ব বুলিও জানিবলৈ দিয়ে । কুওমোয়ে টুইট যোগে নিউয়ৰ্কৰ কুইনত ইউএছ অ'পেনৰ আয়োজনৰ কথা উল্লেখ কৰি খেলুৱৈ, ষ্টাফ, শক্ত পৰীক্ষা, স্বচ্ছতা, অতিৰিক্ত লকাৰ, ৰূমৰ আহল-বহল, উৎসর্গীকৃত আৱাস আৰু পৰিবহন ব্যৱস্থাৰ কথা উল্লেখ কৰে ।
উল্লেখ্য় যে, বহু টেনিছ তাৰকাই ইউএছ অ'পেনৰ সৈতে আগবাঢ়ি যোৱাৰ কথা প্ৰকাশ কৰাৰ পাচতেই টুৰ্ণামেণ্টৰ আয়োজনৰ সিদ্ধান্ত গ্ৰহণ কৰা হৈছে । এই সন্দৰ্ভত অষ্ট্ৰেলিয়াৰ টেনিছ খেলুৱৈ নিক কিৰজিঅ'ছে কৈছে কৰ'ণা ভাইৰাছৰ মহামাৰীৰ বৰ্তমানৰ পৰিস্থিতি বিবেচনা কৰি ইউএছ অ'পেনৰ সৈতে আগবাঢ়ি যোৱা সিদ্ধান্ত গ্ৰহণ কৰাটো এটা স্বাৰ্থপৰ পদক্ষেপ ।