27 ছেপ্তেম্বৰৰ পৰা অনুষ্ঠিত হ'ব ফ্ৰেন্স অ'পেন

দৰ্শকৰ উপস্থিতিত অনুষ্ঠিত কৰা হ'ব গ্ৰেণ্ডশ্লাম প্ৰতিযোগিতা ফ্ৰেন্স অ'পেন । কৰ'ণা ভাইৰাছৰ পাচত ক্ৰীড়াজগতৰ বহু সংখ্যক মেচ দৰ্শকবিহীন ভাৱে অনুষ্ঠিত কৰাৰ সময়ত দর্শকৰ উপস্থিতিত ফ্রেন্স অ'পেন অনুষ্ঠিত কৰাৰ ঘোষণা ফ্রেন্স টেনিছ ফেডাৰেচনৰ ।

স্পৰ্টছ ডেস্ক, 19 জুনঃ টেনিছ ক্ৰীড়াপ্ৰেমীৰ বাবে আহিছে সুঃখবৰ । চলিত বৰ্ষতে অনুষ্ঠিত হ'ব টেনিছ জগতৰ খ্যাতিপূৰ্ণ গ্ৰেণ্ডশ্লাম প্ৰতিযোগিতা ফ্ৰেন্স অ'পেন। আগন্তুক 27 ছেপ্তেম্বৰৰপৰা 11 অক্টোবৰলৈ অনুষ্ঠিত কৰা হ'ব ফ্ৰেন্স অ'পেন ৷

লক্ষ্যণীয় কথা এই যে, দৰ্শক বিহীনভাৱে নহয় দৰ্শকৰ উপস্থিতিত অনুষ্ঠিত কৰা হ'ব 2020 ফ্রেন্স অ'পেন প্ৰতিযোগিতা । দর্শকৰ অনুপস্থিতিত এই প্ৰতিযোগিতা অনুষ্ঠিত কৰা নহয় বুলি স্পষ্ট কৰা হৈছে । অৱশ্যে ষ্টেডিয়ামত কিমান সংখ্যক দর্শকৰ বাবে আসন মুকলি থাকিব, সেই সন্দর্ভত কর্তৃপক্ষৰ সৈতে আলোচনাৰ পাচতেই চূড়ান্ত সিদ্ধান্ত গ্ৰহণ কৰা হ'ব বুলি জানিবলৈ দিয়ে ফ্রেন্স টেনিছ ফেডাৰেচনৰ অধ্য়ক্ষ বাৰ্ণাড গিওডিছেলিয়ে ।

চলিত মাহৰ শেষৰ ফালে অথবা জুলাইৰ আৰম্ভণিৰ পৰা দর্শকৰ বাবে এই প্ৰতিযোগিতাৰ টিকট মুকলি কৰা হ'ব বুলি উল্লেখ কৰে । পূৰ্বেতে 20 ছেপ্তেম্বৰৰ পৰা 4 অক্টোবৰৰ ভিতৰত আয়োজনৰ কথা আছিল ফ্ৰেন্স অ'পেন ।

উইম্বলডন বাতিল হলেও শেহতীয়াকৈ ইউএছ অ'পেন আৰু ফ্ৰেন্স অ'পেনৰ আয়োজনৰ খবৰে সঁচাকৈয়ে খেলুৱৈ আৰু বহু ক্ৰীড়াপ্ৰেমীৰ মাজত এতিয়া আনন্দৰ বাৰ্তা কঢ়িয়াই আনিছে । অহা 31 আগষ্টৰ পৰা 13 চেপ্তেম্বৰলৈ অনুষ্ঠিত কৰা হ'ব আন এক গ্ৰেণ্ডশ্লাম প্ৰতিযোগিতা ইউএছ অ'পেন । অৱশ্য়ে বন্ধ দুৱাৰৰ মাজত অনুষ্ঠিত কৰা হ'ব এই প্ৰতিযোগিতা ।

লগতে চাওকঃ অৰুণাচলত NSCN(R) ৰ দুই দুধৰ্ষ কেডাৰ আটক