স্পৰ্টছ ডেস্ক,১৯ মাৰ্চ :ভাৰতৰ ৰোহন বোপান্না আৰু অষ্ট্ৰেলিয়াৰ মেট এবডেনৰ যুটিয়ে অৰ্জন কৰিলে এটিপি মাষ্টাৰ্ছ ১০০০ ইভেণ্টৰ খিতাপ (Rohan Bopanna won ATP masters)। বি এন পি পাৰিবাছ অপেন টেনিছ টুৰ্ণামেণ্টত ভাৰত-অষ্ট্ৰেলিয়া যুটিয়ে পুৰুষৰ দ্বৈত খিতাপ জয় কৰে । ইফালে এই খিতাপ জয়ৰ লগে লগে এটিপি মাষ্টাৰ্ছ ১০০০ ইভেণ্ট জয় কৰা আটাইতকৈ প্ৰবীণ খেলুৱৈ হিচাপে পৰিগণিত হয় (Rohan Bopanna oldest player to win ATP masters)। বৰ্তমান বোপান্নাৰ বয়স ৪৩ বছৰ ।
তেওঁৰ যুটি এবডেনৰ বয়স ৩৫ বছৰ । বোপান্না আৰু এবডেনৰ যুটিয়ে শনিবাৰে ফাইনেলত নেডাৰলেণ্ডৰ ৱেছলি কুলহফ আৰু ব্ৰিটেইনৰ নীল স্কুপস্কিৰ যুটিক ৬-৩, ২-৬, ১০-৮ পইণ্টত পৰাস্ত কৰে ।
দশম এটিপি মাষ্টাৰ্ছ ১০০০ ফাইনেল খেলাৰ পাছত বোপান্নাই কয় যে তেওঁ বহু বছৰ ধৰি এই প্ৰতিযোগিতাত খেলি আছে আৰু খেলুৱৈসকলক খিতাপ অৰ্জন কৰা দেখি আহিছে । অষ্ট্ৰেলিয়াৰ মেট (Australian player Matt Ebden) আৰু তেওঁ এই খিতাপ অৰ্জন কৰি যথেষ্ট সুখী । আনহাতে তেওঁলোকে প্ৰতিযোগিতাত শ্ৰেষ্ঠ যুটিৰ মুখামুখি হৈছিল আৰু ট্ৰফী জয়ী হৈ তেওঁলোক যথেষ্ট সুখী বুলিও খেলুৱৈগৰাকীয়ে উল্লেখ কৰে ।
খিতাপ অৰ্জনৰ লগে লগে খিতাপ অৰ্জন কৰা আটাইতকৈ প্ৰবীণ খেলুৱৈ হিচাপে পৰিগণিত হৈছে বোপান্না । ইয়াৰ লগে লগে কানাডাৰ ডেনিয়েল নেষ্টৰকো অতিক্ৰম কৰে বোপান্নাই । ডেনিয়েল নেষ্টৰে ২০১৫ চনত ৪২ বছৰ বয়সত ছিনচিনাটি মাষ্টাৰ্ছ খিতাপ অৰ্জন কৰিছিল ।
২০১৭ চনত মণ্টিকাৰ্লো অপেনৰ পাছত এইটো বোপান্নাৰ সামগ্ৰিকভাৱে পঞ্চম আৰু প্ৰথম মাষ্টাৰ্ছ ১০০০ দ্বৈত খিতাপ । এইবছৰ ভাৰত আৰু অষ্ট্ৰেলিয়াৰ যুটিৰ এইটো তৃতীয়খন ফাইনেল আছিল । বোপান্নাই এতিয়ালৈকে ট্যুৰ পৰ্যায়ত মুঠ ২৪ টা খিতাপ অৰ্জন কৰিছে । বোপান্না আৰু এবডেনে ছেমিফাইনেলত ডিফেণ্ডিং চেম্পিয়ন আৰু দুবাৰৰ খিতাপ বিজয়ী জন ইছনাৰ আৰু জেক চকক পৰাস্ত কৰে ।
পূৰ্বে কোৱাৰ্টাৰ ফাইনেলত যুটিটোৱে কানাডাৰ ফেলিক্স অগাৰ এলিচিম আৰু ডেনিছ শাপোভালভক পৰাস্ত কৰে । ইণ্ডো-অষ্ট্ৰেলিয়ান যুটিটোৱে তেওঁলোকৰ উদ্বোধনী খেলখনত ৰাফেল মাটোছ আৰু ডেভিদ ভেগা হাৰ্নান্দেজক পৰাস্ত কৰিছিল । এই জয়ৰ সৈতে, বিশ্বৰ তৃতীয় স্থানৰ প্ৰবীণ বোপান্নাই এটিপি ডাবলছ ৰেংকিঙত চাৰিটা স্থানলৈ আগবাঢ়ি গৈ ১১ সংখ্যক স্থানলৈ উন্নীত হৈছে ।
লগতে পঢ়ক :Yuvraj Singh Met Rishabh Pant : আঘাতপ্ৰাপ্ত ঋষভ পণ্টক উৎসাহিত কৰাৰ প্ৰয়াস যুৱৰাজ সিঙৰ
