নিউজ ডেস্ক , 28 ফেব্ৰুৱাৰীঃ পৃথিৱীজুৰি কৰ’ণা ভাইৰাছৰ আতংকৰ বাবে অনিশ্চয়তাত থকা ট’কিঅ অলিম্পিকৰ সন্দৰ্ভত ইণ্টাৰশ্যনেল অলিম্পিক কমিটিৰ অধ্যক্ষ থমাছ বাছে কয় যে,বিশ্বৰ সৰ্ববৃহৎ প্ৰতিযোগিতাখন অনুষ্ঠিত কৰাটো সুনিশ্চিত কৰিবলৈ অলিম্পিকৰ আয়োজক সমিতিয়ে পূৰ্মোদ্যমে নিজৰ প্ৰচেষ্টা অব্যাহত ৰাখিছে ৷
জাপানৰ সংবাদ মাধ্যমক সম্বোধন কৰি অধ্যক্ষ গৰাকীয়ে কয় যে, এই ক্ষেত্ৰত তেখেতে অন্য কোনো পৰিকল্পনা কৰিব বিচৰা নাই আৰু খেলুৱৈ সকলক আশ্বস্ত কৰিব বিচাৰে যে, এই ক্ষেত্ৰত তেওঁলেকে চিন্তিত হোৱাৰ বিশেষ কাৰণ নাই ৷ নিজৰ অনুশীলন পূৰ্ণোদ্যমে চলাই যাবলৈ খেলুৱৈ সকলক অনুৰোধ জনায় অধ্যক্ষ গৰাকীয়ে ৷
থমাছ বেছয়ে লগতে উল্লেখ কৰে যে,কেৱল টকিঅ’ অনুষ্ঠিত হোৱাটো নিশ্চিত কৰিবলৈ নহয়,অনুষ্ঠিত হ’বলগা প্ৰতিযোগিতাখনৰ মানদণ্ড উন্নত কৰিবলৈও অলিম্পিক কমিটিয়ে প্ৰচেষ্টা অব্যাহত ৰাখিছে ৷ ইণ্টাৰনেশ্যনেল অলিম্পিক কমিটিৰ এগৰাকী সদস্য ডিক পাউণ্ডে সম্প্ৰতি মন্তব্য কৰিছিল যে,যদি প্ৰতিযোগিতাখন অনুষ্ঠিত হ’ব লগা সময়ত কৰ’ণা ভাইৰাছৰ প্ৰাৰ্দুভাৱ কমি নাযায়,অলিম্পিকৰ আয়োজক কমিটিয়ে প্ৰতিযোগিতাখন স্থগিত বা স্থানাস্তৰিত কৰাৰ সলনি সম্পূৰ্ণৰূপে বাতিল কৰাৰ সম্ভাৱনা আছে ৷