স্পৰ্টছ ডেস্ক, ২৮ আগষ্ট :বুডাপেষ্টত উৰিল ভাৰতৰ ত্ৰিৰংগা । পুনৰ এবাৰ বিশ্বৰ বুকুত ভাৰতৰ নাম উজলালে অলিম্পিক বিজয়ী জেভলিন থ্ৰ'ৱাৰ নীৰজ চোপ্ৰাই । বুডাপেষ্টত আয়োজিত বিশ্ব এথলেটিকছ চেম্পিয়নশ্বিপৰ পুৰুষৰ জেভলিন থ্ৰ' ইভেণ্টত সোণৰ পদক লাভ কৰিবলৈ সক্ষম হ'ল । স্বৰ্ণ জয়ৰ পাছতে নীৰজ চোপ্ৰাই এই পদক সকলো ভাৰতীয়ৰ বাবে উছৰ্গা কৰে । নিশা বহু দেৰিলৈ প্ৰতিযোগিতাখন উপভোগ কৰা ভাৰতৰ প্ৰতিগৰাকী ক্ৰীড়াপ্ৰেমীকে তেওঁ ধন্যবাদ জ্ঞাপন কৰে ।
উল্লেখ্য যে বহু প্ৰত্যাশিত ফাইনেলত নীৰজে তেওঁৰ নিকটতম প্ৰতিদ্বন্দী পাকিস্তানৰ নাদিমক পৰাস্ত কৰি প্ৰথম ভাৰতীয় এথলেটিকছ বিশ্ব চেম্পিয়ন হিচাপে পৰিগণিত হয় । আনন্দ প্ৰকাশ কৰি চোপ্ৰাই কয় যে, তেওঁ এতিয়া অলিম্পিক চেম্পিয়ন লগতে বিশ্ব চেম্পিয়ন । ভাৰতীয়সকলক তেওঁলোকৰ নিৰন্তৰ সমৰ্থনৰ বাবে ধন্যবাদ জনাই আৰু দেশখনে অধিক অৰ্জন কৰাৰ প্ৰয়োজনীয়তাৰ ওপৰতো গুৰুত্ব আৰোপ কৰি নীৰজে কয় যে, ভাৰতীয়সকলে বিভিন্ন ক্ষেত্ৰত কঠোৰ পৰিশ্ৰম কৰি থাকক । পৃথিৱীত ভাৰতে এটা নাম প্ৰতিষ্ঠা কৰিব লাগিব বুলিও তেওঁ উল্লেখ কৰে ।