স্পৰ্টছ ডেস্ক,৪ জুন:ভাৰতৰ ক্ৰীড়া জগতৰ তাৰকা মিলখা সিং পুনৰ অসুস্থ । বৃহস্পতিবাৰে 'ফ্লাইং শিখ' খ্যাত ক্ৰীড়াবিদ গৰাকীৰ দেহত অক্সিজেনৰ স্তৰ হ্ৰাস হোৱাৰ লগে লগে চণ্ডীগড়ৰ এখন চিকিৎসালয়ত ভৰ্তি কৰোৱা হয় । তেওঁক বিয়লি প্ৰায় ৩.৩৫ বজাত চণ্ডীগড়ৰ স্নাতকোত্তৰ চিকিৎসা শিক্ষা আৰু গৱেষণা প্ৰতিষ্ঠানৰ (পিজিআইএমইআৰ) আইচিইউত ভৰ্তি কৰোৱা হয় । হাস্পতালখনৰ মুখপাত্ৰ অশোক কুমাৰে জনোৱা মতে সম্প্ৰতি ক্ৰীড়া তাৰকাগৰাকীক পৰ্যবেক্ষণত ৰখা হৈছে আৰু এতিয়া তেওঁৰ স্বাস্থ্য সুস্থিৰ হৈ আছে ।
উল্লেখ্য যে ক'ভিডত আক্ৰান্ত হোৱাৰ পিছত যোৱা মাহত এখন ব্যক্তিগত হাস্পতালত চিকিৎসাধীন হৈ আছিল যদিও পৰিয়ালৰ অনুৰোধত ৯১ বছৰীয়া মিলখা সিঙক দেওবাৰে ঘৰলৈ যাবলৈ দিয়া হৈছিল । ইফালে ক্ৰীড়াবিদ গৰাকীৰ পত্নী নিৰ্মাল কৌড়কো শনিবাৰে অক্সিজেনৰ মাত্ৰা কমি যোৱাৰ পিছতে হাস্পতালৰ আইচিইউলৈ স্থানাস্তৰিত কৰা হৈছে ।