মহিলা বক্সিং চেম্পিয়নশ্বিপৰ ফাইনেলত পৰাস্ত মঞ্জু ৰাণী

মহিলা বক্সিং চেম্পিয়নশ্বিপৰ ফাইনেলত পৰাস্ত হ'ল ভাৰতৰ বক্সাৰ মঞ্জু ৰাণী ৷ দেওবাৰে অনুষ্ঠিত ফাইনেলত ভাৰতীয় বক্সাৰগৰাকীয়ে ৰাছিয়াৰ একাটেৰিনা পাল্টচেভাৰ হাতত পৰাস্ত হয় ৷

স্পৰ্টছ ডেস্ক, 13 অক্টোবৰ : মহিলা বক্সিং চেম্পিয়নশ্বিপৰ ফাইনেলত পৰাস্ত হ'ল ভাৰতৰ বক্সাৰ মঞ্জু ৰাণী ৷ দেওবাৰে অনুষ্ঠিত ফাইনেলত ভাৰতীয় বক্সাৰগৰাকীয়ে ৰাছিয়াৰ একাটেৰিনা পাল্টচেভাৰ হাতত পৰাস্ত হয় ৷ 48 কে. জি. শাখাত ভাৰতীয় বক্সাৰগৰাকীয়ে 1-4 ব্যৱধানত পৰাস্ত হয় ৰাছিয়াৰ প্ৰতিদ্বন্দীগৰাকীৰ বিৰুদ্ধে ৷ ইয়াৰ ফলত টুৰ্ণামেন্টৰ ৰূপৰ পদক দখল কৰিবলৈ সক্ষম হয় মঞ্জু ৰাণীয়ে ৷

ছেমি ফাইনেলত মঞ্জুয়ে থাইলেণ্ডৰ চুথামাত ৰক্ষতক 4-1 ব্যৱধানত পৰাস্ত কৰি ফাইনেললৈ অগ্ৰসৰ হৈছিল ৷ উল্লেখ্য যে, ভাৰতৰ হৈ একমাত্ৰ বক্সাৰ হিচাপে টুৰ্ণামেন্টৰ ফাইনেলত প্ৰৱেশ কৰিছিল মঞ্জু ৰাণীয়ে ৷ ইয়াৰোপৰি, 18 বৰ্ষীয় খেলুৱৈ হিচাপে প্ৰথমখন বক্সিং চেম্পিয়নশ্বিপতে অংশগ্ৰহণ কৰি ফাইনেললৈ অগ্ৰসৰ হোৱা প্ৰথমগৰাকী ভাৰতীয় হিচাপে পৰিগণিত হ'ল মঞ্জু ৰাণী ৷

ৰূপৰ পদক সংগ্ৰহ কৰাৰ মূহুৰ্তত মঞ্জু ৰাণী

উল্লেখ্য যে, শনিবাৰে অনুষ্ঠিত ছেমি ফাইনেল মেচত ভাৰতৰ তাৰকা বক্সাৰ মেৰী কম, ঝমুনা বড়ো আৰু লভলিনা বৰগোঁহাই পৰাস্ত হৈ ব্ৰঞ্জৰ পদকতে ক্ষান্ত থাকিবলগা হৈছিল ৷

মঞ্জু ৰাণী