দক্ষিণ কামৰূপ, 22 অক্টোবৰ: স্ব-গৃহত উপস্থিত হ’ল অসমৰ দুই বক্সাৰ যমুনা বড়ো আৰু লাভলীনা বৰগোহাঁই ৷ ৰাছিয়াত অনুষ্ঠিত হোৱা বিশ্ব মহিলা বক্সিং চেম্পিয়নশ্বিপত ব্ৰঞ্জৰ পদক লাভ কৰি অৱশেষত মঙলবাৰে স্ব-গৃহত উপস্থিত হয় অসমৰ দুই প্ৰতিভাৱান খেলুৱৈ ৷
ভাৰত তথা অসমলৈ গৌৰৱ কঢ়িয়াই অনা দুয়োগৰাকী খেলুৱৈক বৰঝাৰ বিমান বন্দৰত আদৰিবলৈ ভিৰ কৰে সহস্ৰাধিক অনুৰাগীয়ে ৷ বিমান বন্দৰত উপস্থিত হোৱাৰ পিছতে অনুৰাগী সকলে উষ্ম আদৰণি জনাই খেলুৱৈ দুগৰাকীক ।
পোন প্ৰথমবাৰৰ বাবে বিশ্ব মহিলা বক্সিং চেম্পিয়নশ্বিপত অংশ গ্ৰহণ কৰি ব্ৰঞ্জৰ পদক লাভ কৰিবলৈ সক্ষম হোৱা যমুনাই ভৱিষ্যতে সোণৰ পদক লাভ কৰিবলৈ চেষ্টা চলাব বুলি উল্লেখ কৰে ৷ ইপিনে 8 বাৰকৈ বিশ্ব বক্সিং চেম্পিয়নশ্বিপত পদক বুটলিবলৈ সক্ষম হোৱা উত্তৰ পূৰ্বাঞ্চলৰ জীয়ৰী মেৰী কমক অনুসৰণ কৰিয়ে উৎসাহিত হোৱা বুলি কয় যমুনাই ৷ আনহাতে এইবাৰ সোণৰ সলনি ব্ৰঞ্জৰ পদকতে সন্তুষ্ট থাকিবলগীয়া হ’ল বুলি উল্লেখ কৰি অনাগত সময়ত স্বৰ্ণ পদক লাভ কৰাৰ যত্ন কৰিম বুলি কয় লাভলীনা বৰগোঁহাইয়ে ৷