Asian Games 2023 : টেনিছ আৰু স্কোয়াছত সোণৰ পদকৰ পৰা বঞ্চিত ভাৰতীয় দল

চীনা টাইপেইৰ হাতত পৰাস্ত ভাৰতীয় টেনিছ যুটি ৰামকুমাৰ ৰামনাথন আৰু সাকেট মাইনেনি । ৰূপৰ পদতে সন্তুষ্ট থাকিবলগীয়া হ'ল ভাৰতীয় যুটিটো । ভাৰতৰ মহিলা স্কোয়াছ দলটোৰ ব্ৰঞ্জৰ পদক লাভ ।

স্পৰ্টছ ডেস্ক,২৯ ছেপ্টেম্বৰ :চীনৰ হাংঝৌত চলি থকা এছিয়ান গেমছৰ বিভিন্ন ইভেণ্টত ভাৰতীয় খেলুৱৈৰ সফলতা অব্যাহত আছে । টেনিছ ইভেণ্টত ভাৰতৰ যুটি ৰামকুমাৰ ৰামনাথন আৰু সাকেট মাইনেনিয়ে ৰূপৰ পদক লাভ কৰিবলৈ সক্ষম হয় । ফাইনেলত ভাৰতীয় যুটিটো চীনা টাইপেই যুটি জেচন জাং আৰু হু য়ু-হছিউৰ হাতত পৰাস্ত হয় । ৬-৪, ৬-৪ পইণ্টত পৰাস্ত হয় ভাৰতীয় যুটিটো ।

এছিয়ান গেমছৰ পূৰ্বৰ সংস্কৰণত এটা স্বৰ্ণসহ তিনিটা পদক লাভ কৰা ভাৰতীয় যুটিটো এই প্ৰদৰ্শনত সুখী নহয় । ইফালে চলিত এছিয়ান গেমছত এতিয়ালৈকে ভাৰতীয় টেনিছ খেলুৱৈসকল এক কঠিন পৰিশ্ৰমৰ সন্মুখীন হৈছে । সেয়েহে খালী হাতেৰে উভতি অহাত কৈ ভাৰতীয় যুটিটোৱে ৰূপৰ পদক লাভ কৰাতো স্বস্তিৰ নিশ্বাস হ'ব । লক্ষণীয়ভাৱে, এছিয়ান গেমছত ভাৰতে এতিয়ালৈকে পুৰুষৰ দ্বৈত প্ৰতিযোগিতাত ৫ টা সোণৰ পদক লাভ কৰিছে ।

ইফালে স্কোয়াছ ইভেণ্টত ভাৰতৰ প্ৰদৰ্শনো দুৰ্বল দেখা গৈছে । শুকুৰবাৰে হংকঙৰ বিৰুদ্ধে দলীয় ইভেণ্টৰ ছেমি ফাইনেলত ১-২ গ'লত পৰাস্ত হৈ ভাৰতৰ মহিলা স্কোয়াছ দলটোৱে ব্ৰঞ্জৰ পদকতে সন্তুষ্ট থাকিবলগীয়া হয় । প্ৰথম পৰ্যায়ত হংকঙৰ খেলুৱৈসকলৰ সন্মুখত প্ৰত্যাহ্বানৰ সৃষ্টি কৰিলেও পিছৰ ফালে ভাৰতীয় দলটোৱে পৰাজয় চিকাৰ কৰিবলৈ বাধ্য হয় ।

ইফালে ভাৰতে এছিয়ান গেমছ ২০২৩ত এক মিশ্ৰিত প্ৰদৰ্শন দেখুৱাবলৈ সক্ষম হৈছে । এতিয়ালৈ ভাৰতীয় খেলুৱৈসকলে ৩১ টা পদক লাভ কৰিছে । তাৰ ভিতৰত ৮ টা সোণ, ১১ টা ৰূপ আৰু ১২ টা ব্ৰঞ্জৰ পদক অন্তৰ্ভুক্ত আছে । শ্বুটিং ইভেণ্টত ভাৰতে দলীয় আৰু ব্যক্তিগত শাখাত মুঠ ১৭ টা পদক লাভ কৰিছে ।

লগতে পঢ়ক :Asian Games 2023: ১০ মিটাৰ এয়াৰ পিষ্টল শাখাত স্বৰ্ণজয় পলকৰ; ইশাৰ ৰূপৰ পদক লাভ