স্পৰ্টছ ডেস্ক, ২৬ অক্টোবৰ : চীনৰ হাংঝৌত অনুষ্ঠিত পেৰা এছিয়ান গেমছত ভাৰতৰ খেলুৱৈসকলে এইবাৰ সুন্দৰ প্ৰদৰ্শন অব্যাহত ৰাখিছে । ভাৰতীয় পেৰা-এথলীটসকলে গেমছৰ এই সংস্কৰণত সৰ্বশ্ৰেষ্ঠ প্ৰদৰ্শন কৰি পূৰ্বৰ অভিলেখ অতিক্ৰম কৰিছে । ভাৰতে ২০১৮ পেৰা এছিয়ান গেমছত ৭২ টা পদক জয় কৰিছিল । বৃহস্পতিবাৰে ভাৰতে এই সংখ্যা অতিক্ৰম কৰিছে । বৰ্তমান ভাৰতৰ মুঠ পদকৰ সংখ্য়া ৭৩ টালৈ বৃদ্ধি পাইছে । উল্লেখ্য যে শেহতীয়াকৈ অনুষ্ঠিত এছিয়ান গেমছতো ভাৰতে পূৰ্বৰ অভিলেখ ভংগ কৰি ১০৭ টা পদক জয় কৰি সুন্দৰ প্ৰদৰ্শন কৰিছিল ।
আনহাতে, ভাৰতৰ প্ৰধানমন্ত্ৰী নৰেন্দ্ৰ মোদীয়ে এক্সত এক পোষ্টত ভাৰতীয় দলটোক ইয়াৰ বাবে অভিনন্দন জনাইছে । তেওঁ লিখিছে, "এছিয়ান পেৰা গেমছত এক স্মৰণীয় সাফল্য, য'ত ভাৰতে অভূতপূৰ্ব ৭৩ টা পদক জয় কৰিছে আৰু এতিয়াও শক্তিশালী স্থিতিত আছে । ভাৰতীয় খেলুৱৈসকলে জাকাৰ্টা ২০১৮ এছিয়ান পেৰা গেমছত আমাৰ পূৰ্বৰ ৭২ টা পদকৰ অভিলেখ ভংগ কৰিছে । এই গুৰুত্বপূৰ্ণ অনুষ্ঠানটো আমাৰ খেলুৱৈসকলৰ সংকল্পৰ প্ৰতীক । ইতিহাসত নাম লিপিবদ্ধ কৰা আমাৰ ব্যতিক্ৰমী পেৰা-এথলীটসকলক আন্তৰিক অভিনন্দন জনাইছোঁ, যিসকলে প্ৰতিগৰাকী ভাৰতীয়ৰ হৃদয়ক অপৰিসীম আনন্দেৰে ভৰাই তুলিছে । তেওঁলোকৰ প্ৰতিশ্ৰুতি, অধ্যৱসায় আৰু উৎকৃষ্ট হোৱাৰ অটল আকাংক্ষা সঁচাকৈয়ে অনুপ্ৰেৰণাদায়ক । আশাকৰোঁ এই ঐতিহাসিক সাফল্যই এক পথপ্ৰদৰ্শক হিচাপে কাম কৰিব আৰু ভৱিষ্যত প্ৰজন্মক অনুপ্ৰাণিত কৰিব ।"
উল্লেখ্য যে বৃহস্পতিবাৰে পুৱা নিত্য শ্ৰীয়ে মহিলাৰ একক এছএইচ৬ ইভেণ্টত সুন্দৰ প্ৰদৰ্শন কৰি ব্ৰঞ্জৰ পদক অৰ্জন কৰে । যাৰ ফলত ভাৰতীয় দলটোৰ পদকৰ সংখ্যা ৭৩ টালৈ বৃদ্ধি যায় । পেৰা গেমছত ভাৰতে বিগত তিনিদিনত ৩০ টা পদক অৰ্জন কৰিছিল । যাৰ ফলত ভাৰতৰ পদকৰ সংখ্যা ৬৫ লৈ বৃদ্ধি হয় । চতুৰ্থদিনা দেশৰ খেলুৱৈসকলে তেওঁলোকৰ মুঠ ৬৫ টা পদকত আৰু আঠটা পদক যোগ কৰে ।