অলিম্পিক টেষ্ট ইভেন্টত ভাৰতীয় পুৰুষ হকী দলৰ পৰাজয়

অলিম্পিক টেষ্ট ইভেন্টৰ দ্বিতীয় মেচত পৰাজয়ৰ সন্মুখীন হয় ভাৰতীয় পুৰুষ হকী দল ৷ নিউজিলেণ্ডৰ হাতত 1 - 2 ব্যৱধানত পৰাস্ত হয় দলটো ৷

স্পৰ্টছ ডেস্ক, 18 আগষ্ট : অলিম্পিক টেষ্ট ইভেন্টৰ দ্বিতীয় মেচত পৰাজয়ৰ সন্মুখীন হয় ভাৰতীয় পুৰুষ হকী দল ৷ দেওবাৰে অ'ই হকী ষ্টেডিয়ামত অনুষ্ঠিত মেচত নিউজিলেণ্ডৰ বিৰুদ্ধে 1 - 2 ব্যৱধানত পৰাস্ত হয় ভাৰতীয় দলটো ৷ ভাৰতৰ হৈ অধিনায়ক হৰমনপ্ৰীত সিঙে মেচৰ 2 মিনিটতে এটা গ'ল কৰি সুন্দৰ আৰম্ভণি ঘটাইছিল ৷ কিন্তু নিউজিলেণ্ডৰ হৈ 47 মিনিটত জেকব স্মিথ আৰু 60 মিনিটত ছেম লেনে দুটাকৈ গ'ল পৰিশোধ কৰি ভাৰতৰ জয়ত চেঁচা পানী ঢালে ৷

বিশ্ব ৰেংকিঙৰ 5 সংখ্যক স্থানৰ ভাৰতীয় দলে আক্ৰমণাত্মক ভাৱে মেচৰ আৰম্ভণি কৰিছিল আৰু প্ৰথম কেইমিনিট মানলৈকে বিপক্ষৰ দলৰ ওপৰত আধিপত্য বিস্তাৰ কৰিবলৈ সক্ষম হৈছিল ৷ কিন্তু, অন্তিম সময়ত নিউজিলেণ্ড দলে প্ৰত্যাৱৰ্তন ঘটাই দুটাকৈ গ'ল কৰিবলৈ সক্ষম হয় ৷

উল্লেখ্য যে, টুৰ্ণামেন্টৰ প্ৰথমখন মেচত ভাৰতীয় পুৰুষ দলটোৱে মালয়েছিয়াৰ বিৰুদ্ধে 6 - 0 ব্যৱধানত বিশাল জয় সাব্যস্ত কৰিবলৈ সক্ষম হৈছিল ৷ আগষ্টৰ 20 তাৰিখে ভাৰতে আয়োজক জাপানৰ বিৰুদ্ধে পইন্ট তালিকাৰ দ্বিতীয় স্থান দখলৰ লক্ষ্যৰে নামিব ৷