ATK মোহন বাগান এফ চি ত্যাগ কৰিলে BCCIৰ অধ্যক্ষ সৌৰভ গাংগুলীয়ে

স্বাৰ্থজনিত সংঘাত এৰাই চলিবলৈ এটিকে মোহন বাগান এফ চি(ATK Mohun Bagan FC)ৰ সঞ্চালক পদ ত্যাগ কৰিলে BCCIৰ অধ্যক্ষ সৌৰভ গাংগুলীয়ে । বুধবাৰে গাংগুলীয়ে এই কথা প্ৰকাশ কৰে । আনহাতে, চিভিচি কেপিটেলক লৈ আৰম্ভ হৈছে আন এক বিতৰ্ক ।

স্পৰ্টছ ডেস্ক, ২৮ অক্টোবৰ: BCCIৰ অধ্যক্ষ সৌৰভ গাংগুলীয়ে বুধবাৰে ইণ্ডিয়ান চুপাৰ লীগ (ISL) ক্লাব এটিকে মোহন বাগান এফ চিৰ সঞ্চালকৰ পদ ত্যাগ কৰে । সোমবাৰে এটিকে মোহন বাগান এফ চিৰ স্বত্বাধিকাৰী আৰ পি এছ জি ভেঞ্চাৰছ প্ৰাইভেট লিমিটেডে লক্ষ্ণৌত নতুনকৈ আই পি এল দলৰ অধিকাৰ লাভ কৰিছে আৰু ৭,০৯০ কোটি টকাৰ নিবিদাৰ অভিলেখ গঢ়ে । আৰ পি এছ জি এতিয়া আই পি এলৰ এটা অংশ । এনে সময়তে স্বাৰ্থজনিত সংঘাত এৰাই চলিবলৈ এটিকে মোহন বাগান এফ চিৰ পৰা পদত্যাগ কৰে সৌৰভ গাংগুলীয়ে ।

তেওঁ সঞ্চালক হিচাপে দায়িত্ব পালন কৰি আছিল । আনহাতে, সঞ্জীৱ গোয়েংকা বৰ্ড অৱ ডিৰেক্টৰছৰ অধ্যক্ষৰ দায়িত্বত আছে । আনহাতে চি ভি চি কেপিটেলক লৈও আৰম্ভ হৈছে আন এক বিতৰ্ক । ৫৬২৫ কোটি টকাৰ নিবিদাৰে আহমেদাবাদ আই পি এল ফ্ৰেঞ্চাইজিৰে চুক্তি কৰিছিল চি ভি চি কেপিটেলে । এই সন্দৰ্ভত আই পি এলৰ প্ৰাক্তন আয়ুক্ত ললিত মোডীয়ে বি চি চি আইৰ ওপৰত প্ৰশ্ন উত্থাপন কৰে ।

বিচিচিআয়ে চিভিচি কেপিটেলছৰ বিষয়ে পুংখানুপুংখভাৱে পৰীক্ষা নকৰাক লৈ আশ্চৰ্য প্ৰকাশ কৰে মোডীয়ে । ইংলেণ্ডত চিভিচি কেপিটেলৰ এটা বেটিং কোম্পানী আছে ।

তেওঁ অভিযোগ তোলে যে, বিচিচিআয়ে তেওঁলোকৰ হোমৱৰ্ক কৰা নাছিল আৰু পৰীক্ষা কৰা নাছিল যে এগৰাকী নিবিদাকাৰীৰ বেটিং কোম্পানীও আছে । চিভিচি কেপিটেল স্কাই বেটিঙৰ ৮০ শতাংশৰ গৰাকী । এনে ক্ষেত্ৰত দুৰ্নীতি কেনেদৰে নিয়ন্ত্ৰণ কৰিব বুলিও তেওঁ প্ৰশ্ন উত্থাপন কৰে ।

তেওঁ কয় যে, বেটিং অবৈধ আৰু সেয়ে, বেটিং কোম্পানী থকা নিবিদাদাতাক অযোগ্য ঘোষণা কৰা উচিত আৰু দ্বিতীয় শ্ৰেষ্ঠ নিবিদাদাতাক ফ্ৰেঞ্চাইজি প্ৰদান কৰিব লাগে । মোডীয়ে মঙলবাৰে টুইটযোগে এই অভিযোগ তোলাৰ পাছতে চৰ্চা অব্যাহত আছে । তেওঁ কয় যে, চিভিচি কেপিটেলে আন লীগত অংশগ্ৰহণ কৰাটো ডাঙৰ কথা নহয়, কিয়নো তেনে লীগত বেটিং কোম্পানীবোৰক অনুমতি দিয়া হয় ।

কিন্ত এতিয়াও ভাৰতত বেটিং কৰাৰ অনুমতি দিয়া হোৱা নাই । ইতিমধ্যে ২০১৩ চনত বেটিঙক লৈ সমস্য়াৰ সৃষ্টি হৈছিল । উল্লেখ্য যে, লক্ষ্ণৌ আৰু আহমেদাবাদ ফ্ৰেঞ্চাইজিয়ে ২০২২ চনৰ পৰা আই পি এলত অংশগ্ৰহণ কৰিব ।

লগতে পঢ়ক:পাকিস্তানৰ টিভি চেনেল PTV sportsৰ পৰা পদত্যাগ কৰিলে ছোৱেইব আখটাৰে