স্প’ৰ্টছ ডেস্ক, 13 নৱেম্বৰ:চলিত বিশ্বকাপৰ অন্তিমখন লীগ মেচত দেওবাৰে বেংগালুৰুৰ এম চিন্নাস্বামী ষ্টেডিয়ামত নেদাৰলেণ্ডৰ বিৰুদ্ধে বিজয় সাব্যস্ত কৰে ভাৰতীয় ক্ৰিকেট দলে ৷ বৰ্তমানলৈকে বিশ্বকাপৰ এই যাত্ৰাত বিজয়ৰ ধাৰা অক্ষুণ্ণ ৰাখিবলৈ সক্ষম হৈছে ৰোহিত শৰ্মা নেতৃত্বাধীন মেন ইন ব্লুৱে ৷ এতিয়া আৰম্ভ হ’ব বিশ্বকাপৰ নক্ আউট পৰ্যায় ৷ ছেমি ফাইনেলত নিউজীলেণ্ডৰ মুখামুখি হ’ব ভাৰত ৷
ভাৰতীয় দলৰ মুখ্য প্ৰশিক্ষক ৰাহুল দ্ৰাবিড়ে কয় যে বিশ্বকাপ ছেমি ফাইনেলত চাপৰ সৈতে মোকাবিলা কৰিবলৈ ভাৰতীয় দল আশ্বস্ত হৈছে ৷ বিশ্বকাপ 2023 ত বৰ্তমানলৈকে সবাতোকৈ সফল দল হিচাপে পৰিগণিত হৈছে ভাৰত ৷ কিয়নো ভাৰতে বৰ্তমানলৈকে এখনো খেলত পৰাজিত হোৱা নাই ৷ কিন্তু এতিয়া অনুৰাগীৰ হৃদস্পন্দন বাঢ়ি গৈছে ৷ কাৰণ ছেমি ফাইনেলত ভাৰতৰ সমুখত আছে নিউজীলেণ্ড ৷ এই যুঁজ কঠিন হ’ব বুলি ধাৰণা কৰা হৈছে ৷
2019 ৰ বিশ্বকাপলৈ যদি উভতি চোৱা যায়, তেন্তে ভাৰতীয় খেলুৱৈৰ মনত চাপ বৃদ্ধি পোৱাতো স্বাভাৱিক বুলি ক’ব পাৰি ৷ কিয়নো 2019 ৰ বিশ্বকাপৰ ছেমি ফাইনেলতো ভাৰত মুখামুখি হৈছিল নিউজীলেণ্ড আৰু ভাৰতক পৰাজিত কৰি ইংলেণ্ডৰ বিৰুদ্ধে ফাইনেলত অৱতীৰ্ণ হৈছিল কিৱি বাহিনী ৷ এইবাৰ পুনৰ বিশ্বকাপৰ ছেমিফানেলত মুখামুখি হ’ব ভাৰত-নিউজীলেণ্ড ৷ আগৰ খেল কেইখনত সুন্দৰ প্ৰদৰ্শন কৰিলেও কিন্তু টীম ইণ্ডিয়াৰ ওপৰত এতিয়া চাপ থাকিব ৷ কাৰণ এইখন হ’ব নক্ আউট মেচ ৷ অৱশ্যে দলটোৰ মুখ্য প্ৰশিক্ষক দ্ৰাবিড় আশাবাদী যে দলটোৱে ছেমি ফাইনেলত চাপ নিয়ন্ত্ৰণত ৰাখি সুন্দৰ প্ৰদৰ্শন কৰিবলৈ সক্ষম হ’ব ৷