স্প’ৰ্টছ ডেস্ক, ১৭ নৱেম্বৰ: বিশ্বকাপ ২০২৩ৰ ছেমি ফাইনেলত বৃহস্পতিবাৰে ভাৰতে নিউজীলেণ্ডক ৭০ ৰানত পৰাস্ত কৰি ফাইনেলত প্ৰৱেশ কৰে ৷ বিৰাট কোহলীয়ে এদিনীয়াৰ ৫০ সংখ্যক শতক অৰ্জনেৰে অভিলেখ ৰচে আৰু শ্ৰেয়াস আয়েৰে আক্ৰমণাত্মক শতকীয় ইনিংছ খেলিছিল । অৱশ্যে মহম্মদ ছামীয়ে ৭ টা উইকেট দখল কৰি মূল মেচখনত সকলো লাইমলাইট দখল কৰে । এই উজ্জ্বল প্ৰদৰ্শনৰ কথা প্ৰকাশ কৰি মহম্মদ শ্বামীৰ প্ৰশিক্ষক বদৰুদ্দিন ছিদ্দিকিয়ে আনন্দ প্ৰকাশ কৰাৰ লগতে এই কথাও কয় যে বলাৰসকলে এই পৰ্যন্ত প্ৰতিযোগিতাখনত সকলোৰে দৃষ্টি আকৰ্ষণ কৰিছে ।
ইটিভি ভাৰতৰ সৈতে এক আছুতীয়া সাক্ষাৎকাৰত ছিদ্দিকিয়ে কয়, "টুৰ্ণামেণ্টৰ আৰম্ভণিতে বেটছমেনসকলৰ ওপৰত গুৰুত্ব দিয়া হৈছিল । অৱশ্যে এইবাৰ বলাৰসকলৰ বিষয়ে বহু কথাই চৰ্চা হৈছে । লগতে, মহম্মদ শ্বামীৰ প্ৰদৰ্শনৰ বাবে দলটোৱে জয়ৰ চিত্ৰপট ৰচা দেখি মই সুখী ।"
ৰাষ্ট্ৰীয় দলটোৰ হৈ শ্বামীয়ে ৯.১৩ গড়ৰে ৬ খন মেচত ২৩ টা উইকেট দখল কৰি বলৰ সৈতে জিলিকি উঠিছে । আমোদজনক কথাটো হ’ল দলীয় সংমিশ্ৰণৰ বাবে তেওঁ চাৰিখন খেলত মূল একাদশৰ অংশ নাছিল । কিন্তু অল ৰাউণ্ডাৰ হাৰ্দিক পাণ্ডিয়া ভাৰতৰ চতুৰ্থখন লীগ মেচত আঘাতপ্ৰাপ্ত হয় আৰু পাণ্ডিয়াৰ আঘাতে শ্বামীক প্লেয়িং একাদশত স্থান দিয়াৰ পথ প্ৰশস্ত কৰিছিল ।
‘‘সকলো বলাৰক একেলগে খেলাব নোৱাৰি আৰু সেয়েহে (মহম্মদ) শ্বামীক প্ৰতিযোগিতাখনৰ প্ৰাৰম্ভিক অংশৰ বাবে বেঞ্চত বহিবলৈ দিয়া হৈছিল । অৱশ্যে, যেতিয়া তেওঁক লাইনআপত অন্তৰ্ভুক্ত কৰা হৈছিল, তেতিয়া পেচাৰজনে খেলপথাৰত নিজৰ ১০০ শতাংশ দিছিল । এতিয়া, কোনেও শ্বামীক মূল একাদশৰ পৰা বাদ দিয়া চিন্তা কৰিব নোৱাৰে ।” তেওঁ দৃঢ়তাৰে কয় ।