স্পৰ্ট’ছ ডেস্ক, 21 আগষ্ট : সমাগতএছিয়া কাপ খেলিবলৈ সোমবাৰে ভাৰতীয় ক্ৰিকেট দলটো ঘোষণা কৰা হৈছে । মুখ্য নিৰ্বাচক অজিত আগৰকাৰ আৰু অধিনায়ক ৰোহিত শৰ্মাই দল নিৰ্বাচনৰ পিচত নিৰ্বাচিত খেলুৱৈৰ বিষয়ে সংবাদ মেল যোগে অৱগত কৰে ৷ সোমবাৰে বিয়লি এছিয়া কাপ ২০২৩ ত খেলিবলগীয়া দলটোৰ কথা ঘোষণা কৰাৰ সময়ত বিচিচিআইয়ে জনোৱা মতে, উইকেট কীপাৰ বেটছমেন হিচাপে কে এল ৰাহুলৰ সৈতে মিডল অৰ্ডাৰ বেটছমেন শ্ৰেয়স আয়াৰ দললৈ ঘূৰি আহিছে, আনহাতে স্পিন বলাৰ যুজবেন্দ্ৰ চাহালক বাদ দিয়া হৈছে এছিয়া কাপৰ দলৰ পৰা ।
ইয়াৰ উপৰিও টিম ইণ্ডিয়াৰ আটাইতকৈ চৰ্চিত চাৰি নম্বৰ স্থানত বেটিং কৰাৰ বাবে ভাৰতীয় ক্ৰিকেট দলত সূৰ্য্যকুমাৰ যাদৱ আৰু তিলক বাৰ্মাৰ ওপৰত আস্থা প্ৰকাশ কৰি দুয়োজনকে দলত ৰখা হৈছে । মুখ্য নিৰ্বাচক অজিত আগৰকাৰে তিলক বাৰ্মাক প্ৰশংসা কৰাৰ লগতে তেওঁৰ ওপৰত বিশ্বাস ৰখাৰ কাৰণো উল্লেখ কৰে ।
ইয়াৰ উপৰিও ফাষ্ট বলিংত যশপ্ৰীত বুমৰাহো এছিয়া কাপ খেলিবলৈ যাব ৷ ফাষ্ট বলিং বিভাগত মহম্মদ শ্বামীৰ আৰু প্ৰসিদ্ধ কৃষ্ণৰ লগতে মহম্মদ চিৰাজ আৰু শাৰ্দুল ঠাকুৰকো বুমৰাহক সহায় কৰাৰ সুযোগ দিয়া হৈছে ।
এছিয়া কাপ ২০২৩ ত খেলিবলৈ নিৰ্বাচিত সকলো খেলুৱৈয়ে ২৩ আগষ্টৰ পৰা বাংগালুৰুৰ ৰাষ্ট্ৰীয় ক্ৰিকেট একাডেমীত এটা শিবিৰত অংশগ্ৰহণ কৰিব । মুখ্য প্ৰশিক্ষক ৰাহুল দ্ৰাবিড়ৰ উপস্থিতিত, সকলো খেলুৱৈয়ে প্ৰশিক্ষণ ল’ব আৰু তাৰ পিচত এছিয়া কাপলৈ ৰাওনা হ’ব । ইয়াৰ লগতে, সঞ্জু চেমছনক বেকআপ উইকেটকিপাৰ হিচাপে ৰখা হৈছে, যি আৱশ্যকীয় পৰিস্থিতিত দলটোত যোগদান কৰিব ।