স্পৰ্টছ ডেস্ক, ১ নৱেম্বৰ :দিল্লী আৰু মুম্বাইত অনুষ্ঠিত হ'বলগীয়া বিশ্বকাপৰ মেচত আতচবাজী প্ৰদৰ্শন নাথাকে । বায়ুৰ গুণমানৰ অৱনতি ঘটাৰ বাবে বিচিচিআয়ে দেশৰ এই দুখন মুখ্য চহৰত অনুষ্ঠিত হ'বলগীয়া বিশ্বকাপৰ বাকী মেচসমূহৰ সময়ত আতচবাজী প্ৰদৰ্শন নিষিদ্ধ কৰিছে ।
উল্লেখ্য যে দিল্লীত আৰু মাত্ৰ এখন মেচ বাকী আছে । ৬ নৱেম্বৰত এই মেচখন বাংলাদেশ আৰু শ্ৰীলংকাৰ মাজত অনুষ্ঠিত হ'ব । আনহাতে, মুম্বাইত ২ নৱেম্বৰ আৰু ৭ নৱেম্বৰত দুখন লীগ মেচ আৰু ১৫ নৱেম্বৰত ছেমি ফাইনেল অনুষ্ঠিত হ'ব ।
বিচিচিআইৰ সচিব জয় শ্বাহে বুধবাৰে এক বিবৃতিত কয়, "বিচিচিআই পৰিৱেশৰ উদ্বেগৰ প্ৰতি অতি সংবেদনশীল । মই বিষয়টো আনুষ্ঠানিকভাৱে আইচিচিৰ ওচৰত উত্থাপন কৰিছোঁ । মুম্বাইত কোনো আতচবাজী প্ৰদৰ্শন কৰা নহ'ব, যাৰ ফলত প্ৰদূষণৰ স্তৰ বৃদ্ধি হ'ব পাৰে ।"
জয় শ্বাহে কয়, "ভাৰতীয় ক্ৰিকেট নিয়ন্ত্ৰক বোৰ্ডে পাৰিপাৰ্শ্বিক সমস্যাৰ মোকাবিলা কৰিবলৈ প্ৰতিশ্ৰুতিবদ্ধ আৰু ইয়াৰ অনুৰাগী আৰু অংশীদাৰসকলৰ স্বাৰ্থক সদায় শীৰ্ষস্থানত ৰাখিব । বিচিচিআয়ে মুম্বাই আৰু নতুন দিল্লী দুয়োখন চহৰতে বায়ুৰ গুণমানৰ বিষয়ত যি উদ্বেগ তাৰ প্ৰতি দায়বদ্ধ ।"