স্পৰ্টছ ডেস্ক, 3 নৱেম্বৰ :পূৰ্বৰ আইপিএল ছিজন সমূহৰ দৰে এইবছৰৰ আইপিএল ছিজনতো বহুকেইজন যুৱ ক্ৰিকেটাৰে দূৰ্দান্ত প্ৰদৰ্শন আগবঢ়াবলৈ সক্ষম হৈছে ৷ তেওঁলোকৰ ভিতৰত উল্লেখযোগ্য হৈছে, দেৱদত্ত পাল্লিকাল, ৰাহুল তেৱাটিয়া, ৰবী বিষ্ণৈ, টি. নটৰাজন, ৰুতুৰাজ গায়কৱাড, বৰুণ চক্ৰৱৰ্তী, অৰ্শদ্বীপ সিং আদি ৷ সীমিত সুবিধা লাভ কৰি কাৰ্তিক ত্যাগী, তুষাৰ দেশপাণ্ডে, ৰিয়ান পৰাগ, প্ৰিয়ম গাৰ্গ আৰু আব্দুল ছামাদেও ভাল প্ৰদৰ্শন দেখুৱালে ৷ এই ক্ৰিকেটাৰসকলে ভৱিষ্যতে ৰাষ্ট্ৰীয় দলত স্থান লাভ কৰিবলৈ সক্ষম হ'ব বুলি আশা কৰিব পাৰি ৷
আইপিএল 2020 ৰ এনে কিছু যুৱ প্ৰতিভা -
দেৱদত্ত পাল্লিকাল : 20 বৰ্ষীয় ৰয়েল চেলেঞ্জাৰ্ছ বেংগালুৰৰ (RCB) দেৱদত্ত পাল্লিকালে বৰ্তমানলৈকে 14 টা ইনিংছত পাঁচটা অৰ্ধশতকেৰে সংগ্ৰহ কৰিছে 472 ৰাণ ৷ 125 ষ্ট্ৰাইক ৰেটৰ লগতে তেওঁ সংগ্ৰহ কৰিছে 52 টা চাৰি আৰু 8 টা ছয় ৷
ৰাহুল তেৱাটিয়া :পইন্ট তালিকাৰ অন্তিম স্থানত থাকিলেও ৰাজস্থান ৰয়েলছ দলৰ হৈ সকলোৰে দৃষ্টি আকৰ্ষণ কৰিছে ৰাহুল তেৱাটিয়াই ৷ শ্বেলডন কট্ৰেলৰ বলত এটা অ'ভাৰত পাঁচটা ছয় কোবাই ক্ৰীড়ামহলত চৰ্চিত হৈছিল তেৱাটিয়া ৷ সেই মেচত 53 ৰাণৰ ইনিংছ গঢ়ি দলক জয়ী কৰাইছিল তেৱাটিয়াই ৷ এই ইনিংছৰ জৰিয়তে তেওঁ একে ৰাতিৰ ভিতৰতে তাৰকালৈ পৰিণত হৈছিল ৷ মুঠ 11 টা ইনিংছত তেৱাটিয়াই সংগ্ৰহ কৰিছে 255 ৰাণ ৷ লগতে সংগ্ৰহ কৰিছে 10 টাকৈ উইকেট ৷
ৰবী বিষ্ণৈ :লেগ স্পীনাৰ ৰবী বিষ্ণৈয়ে অভিষেক কৰা আইপিএলতে 14 টাকৈ ইনিংছত সংগ্ৰহ কৰিছে 12 টা উইকেট ৷ ইয়াৰ জৰিয়তে কিংছ ইলেভেন পাঞ্জাৱ দলৰ অন্যতম তাৰকা খেলুৱৈ হিচাপে পৰিগণিত হৈছে যুৱ ক্ৰিকেটাৰ গৰাকী ৷ ডেভিদ ৱাৰ্ণাৰ, ঋষভ পন্ত, এৰন ফিন্স, ইয়ন মৰ্গানৰ দৰে বেটছমেনৰ উইকেট দখল কৰিবলৈ সক্ষম হৈছে বিষ্ণৈয়ে ৷ বলিঙত অনিল কুম্বলেৰ দৰে কিছু সাদৃশ্য থকা বিষ্ণৈয়ে ফ্লিপাৰ, টপ স্পীনাৰ আৰু গুগলীৰ জৰিয়তে বেটছমেনক ধৰাশায়ী কৰিবলৈ সক্ষম হৈছে ৷