কাৰ্তিকৰ পৰিৱৰ্তে কলকাতাৰ অধিনায়কৰ দায়িত্বত মৰ্গান

কলকাতা দলৰ নতুন অধিনায়ক ইয়ন মৰ্গান ৷ দিনেশ কাৰ্তিকৰ পৰিৱৰ্তে অধিনায়কৰ দায়িত্ব লাভ কৰিছে মৰ্গানে ৷

স্পৰ্টছ ডেস্ক, 16 অক্টোবৰ :কলকাতা মেনেজমেন্টে দিনেশ কাৰ্তিকৰ পৰিৱৰ্তে ইয়ন মৰ্গানক কলকাতা নাইট ৰাইডাৰ্ছ দলৰ অধিনায়ক হিচাপে নিৰ্বাচিত কৰিছে ৷ উল্লেখ্য যে, বেটিঙত মনোনিৱেশ কৰাৰ লগতে দলৰ জয়ত অৰিহণা যোগোৱাৰ উদ্দেশ্যে অধিনায়কৰ পদৰ পৰা অব্যাহতি ল'ব বিচাৰিছিল কাৰ্তিকে ৷ কাৰ্তিকৰ এই সিদ্ধান্তক সন্মান জনাই মেনেজমেন্টে মৰ্গানক এই নতুন দায়িত্ব প্ৰদান কৰে ৷

দিনেশ কাৰ্তিক

কলকাতা দলৰ মুখ্য কাৰ্যবাহী বিষয়া ভেংকী মাইছৰে কয়, "কাৰ্তিকৰ দৰে অধিনায়ক লাভ কৰি আমি অতি সৌভাগ্যশালী, এইগৰাকী খেলুৱৈয়ে সদায়ে দলটোক আগস্থান দি আহিছে ৷ এনে সিদ্ধান্ত গ্ৰহণ কৰিবলৈ বহু সাহসৰ প্ৰয়োজন ৷ তেওঁৰ সিদ্ধান্তত আমি সতচকিত হৈছো যদিও আমি এই সিদ্ধান্তক সন্মান জনাইছো ৷"

তেওঁ লগতে কয়, "2019 চনৰ বিশ্বকাপজয়ী অধিনায়ক ইয়ন মৰ্গানক পাইও আমি নথৈ আনন্দিত ৷ পূৰ্বে সহ-অধিনায়ক হিচাপে দায়িত্ব পালন কৰা মৰ্গানে নিজেই দলৰ অধিনায়কৰ দায়িত্ব গ্ৰহণ কৰিবলৈ ইচ্ছা প্ৰকাশ কৰে ৷ সমগ্ৰ টুৰ্ণামেন্টতে কাৰ্তিক আৰু মৰ্গানে সহযোগিতাৰে প্ৰদৰ্শন আগবঢ়াই আহিছে ৷ ইয়ন মৰ্গানে নতুন দায়িত্ব গ্ৰহণ কৰাৰ পাচৰ পৰাই দললৈ পৰিৱৰ্তন আহিব বুলি আমি আশা কৰিছো ৷"

লগতে পঢ়ক :আজিৰ মেচত অপ্ৰতিৰোধ্য মুম্বাইৰ বিৰুদ্ধে কলকাতা