স্পৰ্টছ ডেস্ক, 15 অক্টোবৰ : শ্বাৰজাহ ক্ৰিকেট ষ্টেডিয়ামত 31 সংখ্যক মেচত মুখামুখি হ'ব ৰয়েল চেলেঞ্জাৰ্ছ বেংগালুৰ (RCB) আৰু কিংছ ইলেভেন পাঞ্জাৱ ৷
সাতখনৰ ছয়খন মেচতে পৰাস্ত হোৱা কে.এল. ৰাহুলৰ নেতৃত্বাধীন পাঞ্জাৱ দলে কেৱল দুই পইন্ট সংগ্ৰহেৰে পইন্ট তালিতাৰ নিম্নতম স্থানত ৰৈছে ৷ দুই দলত আইপিএলৰ এই ছিজনৰ সৰ্বাধিক ৰাণ সংগ্ৰহকাৰী অধিনায়ক ৰাহুল (387 ৰাণ) আৰু মায়ংক আগৰৱাল (337 ৰাণ) থকাৰ পাচতো দলটোৱে জয় সাব্যস্ত কৰিবলৈ সক্ষম হোৱা নাই ৷ বেটিঙত এই দুই খেলুৱৈৰ বাহিৰে অন্য খেলুৱৈসকল অসফল হোৱাৰ দৰেই বলিঙতো মহম্মদ ছামী আৰু ৰবী বিষ্ণৈৰ বাহিৰে অন্য বলাৰসকল অসমৰ্থ হোৱা পৰিলক্ষিত হৈছে ৷
আনহাতে, বেংগালুৰ দলে 10 পইন্ট সংগ্ৰহেৰে পইন্ট তালিকাৰ তৃতীয় স্থান অধিকাৰ কৰিবলৈ সক্ষম হৈছে ৷ দলটোৰ গুৰুত্বপূৰ্ণ খেলুৱৈ এৰন ফিন্স, দেৱদত্ত পাডিক্কল, বিৰাট কোহলী আৰু এবিডি ভিলিয়াৰ্ছে ভাল প্ৰদৰ্শন অব্যাহত ৰাখিছে ৷
ইয়াৰোপৰি, বলিঙতো দলৰ বলাৰসকলে ভাল প্ৰদৰ্শন দেখুৱাবলৈ সক্ষম হৈছে ৷ দলটোৰ বলাৰ য়ুজবেন্দ্ৰ চাহাল আৰু ৱাশ্বিংটন সুন্দৰে ভাল প্ৰদৰ্শন অব্যাহত ৰাখিছে ৷