স্পৰ্টছ ডেস্ক, 23 অক্টোবৰ : আইপিএলৰ চলিত বৰ্ষত বেটিঙত সংগ্ৰাম অব্যাহত ৰাখিছে বিস্ফোৰক বেটছমেন বেন ষ্টোকছে ৷ বৰ্তমানলৈকে এটাও ছয় কোবাবলৈ সক্ষম হোৱা নাই ইংলেণ্ডৰ অল ৰাউণ্ডাৰগৰাকীয়ে ৷ পূৰ্বৰ মেচত ছানৰাইজাৰ্ছ হায়দৰাবাদৰ বিৰুদ্ধেও অসফল হৈছিল ষ্টোকছ ৷
বিস্ফোৰক বেটিঙৰ বাবে জনাজাত বেন ষ্টোকছে বৰ্তমানলৈকে অংশ লোৱা 5 খন মেচত সন্মুখীন হৈছে 103 টা বলৰ ৷ 110 ৰাণ সংগ্ৰহ কৰা বেটছমেনগৰাকীয়ে কিন্তু এতিয়ালৈকে এটাও ছয় কোবাবলৈ সক্ষম হোৱা নাই ৷ আনহাতে, তেওঁ সংগ্ৰহ কৰিছে 14 টাকৈ চাৰি ৷
ৰোগীয়া পিতৃৰ সৈতে নিউজিলেণ্ডত সময় অতিবাহিত কৰা বাবে পলমকৈ আইপিএলত অংশগ্ৰহণ কৰা বেন ষ্টোকছে বৃহস্পতিবাৰৰ মেচত বহুকেইটা বিশাল শ্বট কোবাবলৈ চেষ্টা কৰিছিল যদিও অসফল হৈছিল ৷
আনহাতে, যোৱা বছৰৰ আইপিএলতো তেওঁ ন খন মেচত কেৱল চাৰিটা ছয় কোবাবলৈ সক্ষম হৈছিল ৷ বেন ষ্টোকছৰ দৰে গ্লেন মেক্সৱেলেও চলিত ছিজনত নিজ দলক নিৰাশ কৰিছে ৷ কিংছ ইলেভেন পাঞ্জাৱৰ ক্ৰিকেটাৰগৰাকীয়ে মুখামুখি হোৱা 87 টা বলত এটাও ছয় কোবাবলৈ সক্ষম হোৱা নাই ৷ আঠটা চাৰিৰে মেক্সৱেলে কেৱল 90 ৰাণ সংগ্ৰহ কৰিছে ৷
লগতে পঢ়ক :আইপিএল 2020 : মুম্বাইৰ বিৰুদ্ধে মৰণপণ যুঁজত চেন্নাই
