স্পৰ্টছ ডেস্ক, 3 নৱেম্বৰ : আইপিএলত আজি অনুষ্ঠিত হ'বলগা মেচত মুম্বাই ইণ্ডিয়ানছক পৰাস্ত কৰি প্লে' অফত প্ৰৱেশ কৰাৰ ক্ষমতা ছানৰাইজাৰ্ছ হায়দৰাবাদৰ আছে বুলি বিশ্বাস কৰে ৱেষ্ট ইণ্ডিজৰ প্ৰাক্তন বেটছমেন ব্ৰায়ান লাৰাই ৷
লাৰাই কয়, "তেওঁলোকে (SRH) নিজৰ কষ্টৰে আজিৰ স্থানত উপনীত হৈছে আৰু শেহতীয়াকৈ তেওঁলোকে ভাল প্ৰদৰ্শন কৰিছে ৷ সেয়েহে, প্ৰত্যাহ্বানৰ বাবে সাজু হৈ থাকিব বুলি আশা কৰিলো ৷"
উল্লেখ্য যে, মুম্বাই ইণ্ডিয়ানছে পূৰ্বেই প্লে' অফত স্থান সুনিশ্চিত কৰিছে আৰু বৃহস্পতিবাৰে প্ৰথমখন কোৱালিফায়াৰত দিল্লী কেপিটেলছৰ বিৰুদ্ধে অৱতীৰ্ণ হ'ব ৷ সেয়েহে, বহু ক্ৰিকেটাৰক বিৰাম কৰিবলৈ দি দলৰ শক্তি সম্পৰ্কত পৰীক্ষা কৰিব পাৰে মুম্বাই দলে ৷
আনহাতে, হায়দৰাবাদে নকআউটত প্ৰৱেশৰ বাবে ডিফেণ্ডিং চেম্পিয়ন মুম্বাইক পৰাস্ত কৰিব লাগিব ৷ আজিৰ মেচত হায়দৰাবাদ জয়ী হ'লে শুকুৰবাৰে এলিমিনেটৰৰ বাবে ৰয়েল চেলেঞ্জাৰ্ছৰ বিৰুদ্ধে অৱতীৰ্ণ হ'ব দলটো ৷
