স্পৰ্টছ ডেস্ক, ২৭ অক্টোবৰ :অষ্ট্ৰেলিয়া আৰু চুবুৰী নিউজিলেণ্ড দল দুটা যেতিয়াই মুখামুখি হয় তেতিয়া সেই খেলখন অতি ৰোমাঞ্চকৰ হৈ পৰে । বিশেষকৈ বিশ্বকাপৰ দৰে প্ৰতিযোগিতাবোৰত দুয়োটা দলৰ মাজত তীব্ৰ সংঘৰ্ষ হোৱা দেখা যায় । দৰ্শকসকলো আগ্ৰহী হৈ থাকে তেনে খেল উপভোগ কৰিবলৈ । অৱশ্যে এতিয়ালৈ বেটিং আৰু বলিঙৰ দ্বাৰা অষ্ট্ৰেলিয়াই নিউজিলেণ্ডৰ ওপৰত আধিপত্য বিস্তাৰ কৰিবলৈ সক্ষম হৈছে ।
বিগত বছৰবোৰৰ ভিতৰত কিৱি বাহিনীৰ বাবে আটাইতকৈ ডাঙৰ প্ৰত্যাহ্বান আছিল মেলবৰ্ণত অনুষ্ঠিত ২০১৫ চনৰ বিশ্বকাপৰ ফাইনেল । য'ত অষ্ট্ৰেলিয়াৰ হাতত নিউজিলেণ্ডৰ শোচনীয় পৰাজয় হৈছিল । ব্ৰেণ্ডন মেককুলাম, মাৰ্টিন গাপ্টিল, ৰছ টেইলৰ, কেন উইলিয়ামছন আৰু ডেনিয়েল ভিটৰিৰ দৰে মহান ক্ৰিকেটাৰ থকা স্বত্বেও কিৱিসকল ৪৫ অভাৰত মাত্ৰ ১৮৩ ৰাণত অলআউট হৈছিল । অষ্ট্ৰেলিয়াই মাত্ৰ ৩৩ অভাৰতে খেলখনত জয়ী হৈছিল আৰু পঞ্চমটো বিশ্বকাপৰ খিতাপ দখল কৰিছিল ।
চলিত বিশ্বকাপতো দুয়োটা দলৰ প্ৰদৰ্শন যথেষ্ট আকৰ্ষণীয় হৈ পৰিছে । প্ৰতিযোগিতাৰ আৰম্ভণিতে হতাশ হ'লেও বৰ্তমান পুনৰ ফৰ্মলৈ আহিছে দলটো । শেহতীয়াকৈ পাকিস্তানৰ বিৰুদ্ধে গ্লেন মেক্সৱেলে আক্ৰমণাত্মক ৰূপ দেখুৱাইছে । মাত্ৰ ৪৩ টা বলতে আকৰ্ষণীয় শতক অৰ্জন কৰিছে মেক্সৱেলে । সমান্তৰালকৈ ডেভিদ ৱাৰ্ণাৰৰ শতকো অতি গুৰুত্বপূৰ্ণ আছিল । ইফালে এডাম জাম্পাৰ দৰ্শনীয় বলিঙে পুনৰ এবাৰ চৰ্চালৈ আনিছে অষ্ট্ৰেলিয়াক ।
২০১৫ চনত প্ৰথমবাৰলৈ ফাইনেলত উপনীত হৈছিল যদিও নিউজিলেণ্ড পৰাস্ত হৈছিল । সমান্তৰালকৈ এতিয়ালৈ ৬ খন বিশ্বকাপৰ ছেমিফাইনেল খেলিছে । অৱশ্যে বৰ্তমানলৈ চলিত বিশ্বকাপত দলটোৱে গুৰুত্বপূৰ্ণ ইনিংছ খেলিছে । সম্প্ৰতি পইণ্ট তালিকাৰ অষ্ট্ৰেলিয়াৰ ওপৰতে আছে নিউজিলেণ্ড । অষ্ট্ৰেলিয়া তালিকাৰ চতুৰ্থ স্থানত আছে ।