স্পৰ্টছ ডেস্ক, ২৩ জুন :ৰুতুৰাজ গায়কোৱাড়, যশস্বী জয়ছোৱাল আৰু মুকেশ কুমাৰে ভাৰতীয় দলৰ আগন্তুক ৱেষ্ট ইণ্ডিজ ভ্ৰমণৰ প্ৰথমখন টেষ্ট মেচৰ বাবে দললৈ আমন্ত্ৰণ লাভ কৰিছে । এই টেষ্টখন অহা ১২ জুলাইৰ পৰা ডমিনিকাত আৰম্ভ হ'ব । আগন্তুক দুখন মেচৰ টেষ্ট শৃংখলাৰ বাবে ভাৰতীয় নিৰ্বাচক সমিতিয়ে ঘোষণা কৰা দলটোত চেতেশ্বৰ পূজাৰা, উমেশ যাদৱ আৰু মহম্মদ ছামী বাদ পৰিছে । আনহাতে, গায়কোৱাড় আৰু জয়ছোৱালক আমন্ত্ৰণ জনোৱাটোৱে ভাৰতীয় টেষ্ট বেটিং লাইন-আপত পৰিৱৰ্তনৰ সম্ভাৱ্য আৰম্ভণি হিচাপে দেখা গৈছে । উল্লেখ্য, এই টেষ্ট শৃংখলাৰ পৰাই ভাৰতৰ ২০২৩-২৫ বিশ্ব টেষ্ট চেম্পিয়নশ্বিপ চক্ৰৰ আৰম্ভণি হ'ব ।
আনহাতে, টেষ্ট শৃংখলাৰ পিছত অনুষ্ঠিত হ'বলগীয়া তিনিখন মেচৰ এদিনীয়া শৃংখলাৰ বাবে ৰুতুৰাজ আৰু মুকেশো দলৰ অংশ হ'ব । লগতে সঞ্জু ছেমছনে দ্বিতীয় বিকল্প উইকেটৰক্ষক-বেটাৰ হিচাপে যোগদান কৰিব । উল্লেখ্য যে ভাৰতে ৱেষ্ট ইণ্ডিজৰ বিৰুদ্ধে পাঁচখন টি-২০ মেচৰ শৃংখলাও খেলিব । টি-২০ মেচৰ বাবে দলটো পৰৱৰ্তী সময়ত ঘোষণা কৰা হ'ব । ডমিনিকাৰ উইণ্ডছৰ পাৰ্কত ১২-১৬ জুলাইলৈ প্ৰথমখন টেষ্ট মেচ অনুষ্ঠিত হ'ব । দ্বিতীয়খন টেষ্ট ২০-২৪ জুলাইলৈ ত্ৰিনিদাদৰ কুইন্স পাৰ্ক অভেলত অনুষ্ঠিত হ'ব । দ্বিতীয়খন টেষ্ট ভাৰত আৰু ৱেষ্ট ইণ্ডিজৰ মাজত খেলা ১০০ সংখ্যক টেষ্ট মেচ হিচাপে পৰিগণিত হ'ব ।
উল্লেখ্য যে প্ৰথম দুখন এদিনীয়া ২৭ আৰু ২৯ জুলাইত বাৰ্বাডোছৰ কেনিংটন অভেলত অনুষ্ঠিত হ'ব । তৃতীয় এদিনীয়াখন ১ আগষ্টত ত্ৰিনিদাদৰ ব্ৰায়ান লাৰা ক্ৰিকেট একাডেমীত অনুষ্ঠিত হ'ব । এই ক্ৰিকেট গ্ৰাউণ্ডে প্ৰথমবাৰৰ বাবে ৱেষ্ট ইণ্ডিজৰ পুৰুষৰ এদিনীয়া মেচ আয়োজন কৰিব ।