স্প’ৰ্টছ ডেস্ক, 23 অক্টোবৰ: ভাৰতত অনুষ্ঠিত এদিনীয়া ক্ৰিকেট বিশ্বকাপ 2023 ৰ মাজতে আহিছে এক দুখৰ খবৰ ৷ ভাৰতীয় ক্ৰিকেট দলৰ প্ৰাক্তন অধিনায়ক তথা মহান স্পিনাৰ বিষণ সিং বেদীৰ সোমবাৰে দেহাৱান ঘটে ৷ দীৰ্ঘদিন ধৰি ৰোগশয্যাত পৰি থকা প্ৰাক্তন ক্ৰিকেটাৰগৰাকীৰ মৃত্যুৰ সময়ত বয়স আছিল 77 বছৰ ৷ ভাৰতৰ বাবে 67 খনকৈ মেচ খেলা বেদীৰ জন্ম হৈছিল 1946 চনৰ 25 ছেপ্টেম্বৰত পঞ্জাবৰ অমৃতসৰত ৷
সত্তৰৰ দশকৰ বিখ্যাত স্পিন কোৱাৰ্টেটৰ অংশ আছিল বিষণ সিং বেদী ৷ তেওঁ ইৰাপল্লী প্ৰসন্ন, বি এছ চন্দ্ৰশেখৰ আৰু এছ ভেংকটৰাঘৱনৰ সৈতে ভাৰতত স্পিন বলিঙৰ ভেটি শক্তিশালী কৰিছিল ৷ এই স্পিন কোৱাৰ্টেটে একেলগে ভাৰতৰ হৈ মুঠ 231 খন টেষ্ট খেলি 853 টা উইকেট দখল কৰে ।
বিষণ সিং বেদীৰ ক্ৰিকেট কেৰিয়াৰ
1966 চনত ভাৰতৰ হৈ টেষ্টত অভিষেক ঘটোৱা বিষণ সিং বেদীয়ে নিজৰ সুন্দৰ প্ৰদৰ্শনেকে ভাৰতক বহু মেচত জয়ী কৰিছিল । ক্ৰিকেট কেৰিয়াৰত ভাৰতৰ হৈ 67 খন টেষ্ট মেচ খেলি বেদীয়ে 28.71 ৰ উৎকৃষ্ট গড়ৰে 266 টা উইকেট দখল কৰে । এই সময়ছোৱাত তেওঁ 14 বাৰ 5 টা উইকেট আৰু এবাৰ 10 টা উইকেট লাভ কৰে । এইগৰাকী কিংবদন্তি স্পিনাৰে 1979 চনত ক্ৰিকেটৰ পৰা অৱসৰ গ্ৰহণ কৰে ।
স্পিন বলিঙেৰে ডাঙৰ বেটছমেনক বিপাঙত পেলোৱা বিষণ সিং বেদীয়ে টীম ইণ্ডিয়াক সুন্দৰভাৱে নেতৃত্ব দিছিল ৷ 1976 চনত মনছুৰ আলী খান পাটৌদিৰ ঠাইত বিষণ সিং বেদীক অধিনায়ক হিচাপে নিযুক্তি দিয়া হয় । 1976 চনৰ পৰা 1978 চনৰ ভিতৰত বেদীয়ে ভাৰতীয় দলক নেতৃত্ব প্ৰদান কৰি দলটোত যুঁজৰ ক্ষমতা জগাই তোলাৰ লগতে অনুশাসনৰ মাপকাঠী নিৰ্ধাৰণ কৰিছিল ।
1976 চনত বেদীৰ নেতৃত্বত ভাৰতে সেই সময়ৰ সবল দল ৱেষ্ট ইণ্ডিজক টেষ্ট শৃংখলাত ৱেষ্ট ইণ্ডিজতে পৰাস্ত কৰে । কিন্তু একেৰাহে কেইবাখনো ছিৰিজ পৰাস্ত হোৱাৰ পাচত তেওঁক অধিনায়ক পদৰ পৰা আঁতৰাই দিয়া হয় আৰু দলৰ কমাণ্ডৰ দায়িত্ব অৰ্পণ কৰা হয় সুনীল গাভাস্কাৰক ।
লগতে পঢ়ক:CWC 2023 : বিৰাট কোহলীৰ ইনিংছক প্ৰশংসা ডাৰিল মিচেলৰ
