স্পৰ্টছ ডেস্ক,১৬ নৱেম্বৰ :বিশ্বকাপ ২০২৩ৰ ছেমি ফাইনেলত মহম্মদ শ্বামীৰ যাদুৱে প্ৰতিগৰাকী ভাৰতীয় অনুৰাগীকে আনন্দিত কৰি তুলিছে । মহম্মদ শ্বামীয়ে শক্তিশালী প্ৰদৰ্শনেৰে খেলখনত ৭ টা উইকেট লাভ কৰে । উইলিয়ামছন আৰু ডেৰিল মিচেলৰ আক্ৰমণাত্মক প্ৰদৰ্শনে ভাৰতীয় দৰ্শকসকলক এসময়ত হতবাক কৰি তুলিছিল । একে মুহূৰ্তত, শ্বামীয়ে ভাৰতৰ হৈ উইকেট দখল কৰি পুনৰ এবাৰ ভাৰতীয় দলটোক খেলখনত ওভতাই আনে । কেৱল সেয়াই নহয় ছেমি ফাইনেলত ভাৰতীয় দলটো জয়ী হয় আৰু ফাইনেলত প্ৰৱেশ কৰে । শ্বামীৰ এনে প্ৰদৰ্শনৰ পাছতে ছেমি ফাইনেলক বহুতে 'শ্বামী ফাইনেল' বুলিও অভিহিত কৰিছে ।
চলিত বিশ্বকাপত, মহম্মদ শ্বামীয়ে তেওঁৰ সৰ্বশ্ৰেষ্ঠ প্ৰদৰ্শনেৰে কেইবাটাও অভিলেখ গঢ়িছে :
মহম্মদ শ্বামীয়ে বুধবাৰে বিশ্বকাপৰ ছেমি ফাইনেলত নিউজীলেণ্ডৰ বিৰুদ্ধে ৫৭ ৰাণ দি ৭ টা উইকেট লৈ ষ্টুৱাৰ্ট বিনীৰ অভিলেখ অতিক্ৰম কৰে । এগৰাকী ভাৰতীয় বলাৰ হিচাপে এখন এদিনীয়াত সৰ্বাধিক উইকেট দখলকাৰী হ'ল ছামী । ইয়াৰ পূৰ্বে বিন্নীয়ে ২০১৪ চনত বাংলাদেশৰ বিৰুদ্ধে এদিনীয়াত ৪ ৰাণ দি ৬ টা উইকেট দখল কৰিছিল । ১৯৯৩ চনত ৱেষ্ট ইণ্ডিজৰ বিৰুদ্ধে অনিল কুম্বলেৰ সৰ্বশ্ৰেষ্ঠ প্ৰদৰ্শন আছিল ১২ ৰাণত ৬ টা উইকেট । ছামীয়ে এই দুয়োটা অভিলেখ ভংগ কৰিছে আৰু ভাৰতৰ হৈ এদিনীয়াৰ সৰ্বশ্ৰেষ্ঠ উইকেট দখলকাৰী হৈছে । তেওঁ ডেভন কনৱে, ৰাচিন ৰবীন্দ্ৰ, ডেৰেল মিচেল, কেন উইলিয়ামছন, টম লেথাম, লকি ফাৰ্গুচন আৰু টিম চাউদীৰ উইকেট দখল কৰে ।
২০১৫ চনৰ পৰা মহম্মদ শ্বামীয়ে ৩ টাকৈ এদিনীয়া বিশ্বকাপ ছিজনত অংশগ্ৰহণ কৰিছে । বিশ্বকাপৰ ১৭ খন মেচ খেলিয়ে তেওঁ ৫০ টা উইকেট দখল কৰিছে । এই ক্ষেত্ৰত তেওঁ অষ্ট্ৰেলিয়াৰ মিচেল ষ্টাৰ্ককো অতিক্ৰম কৰিছে । অষ্ট্ৰেলিয়াৰ ষ্টাৰ্কে ১৯ খন খেলত ৫০ টা উইকেট লাভ কৰিছে ।
চলিত বিশ্বকাপত বেটছমেনসকলৰ সন্মুখত তীব্ৰ প্ৰত্যাহ্বান হিচাপে দেখা গৈছে শ্বামীক । মাত্ৰ ১৭ টা ইনিংছতে শ্বামীয়ে ৫৪ টা উইকেট দখল কৰিছে আৰু বিশ্বকাপত ৪ বাৰ ৫ টা উইকেট দখল কৰিছে । অষ্ট্ৰেলিয়াৰ মিচেল ষ্টাৰ্কে বিশ্বকাপত সৰ্বাধিক ৫ টা উইকেট দখল কৰা বলাৰৰ তালিকাৰ শীৰ্ষত আছিল । অষ্ট্ৰেলিয়ান ফাষ্ট বলাৰজনে ৩ টা বিশ্বকাপত ৩ বাৰকৈ ৫ টা উইকেট দখল কৰিছে । একে সময়তে, মহম্মদ ছামীয়ে ৪ বাৰ এই কৃতিত্ব অৰ্জন কৰিছে ।