স্পৰ্টছ ডেস্ক, 22 ডিচেম্বৰ : ইতিমধ্যেই বহু অভিলেখৰ অধিকাৰী হোৱা ভাৰতীয় অপেনাৰ ৰোহিত শৰ্মাই 2017 চনৰ 22 ডিচেম্বৰত আন এক মাইলষ্টোন সংগ্ৰহ কৰিবলৈ সক্ষম হৈছিল ৷ আজিৰ দিনটোতে ৰোহিত শৰ্মাই টি-20 ক্ৰিকেটত যুটীয়াকৈ দ্ৰুততম শতক অৰ্জন কৰিছিল ৷
শ্ৰীলংকাৰ বিৰুদ্ধে ইণ্ডোৰৰ হলকাৰ ষ্টেডিয়ামত ৰোহিতে মাত্ৰ 35 টা বলতে শতক অৰ্জন কৰিছিল ৷ সোঁহতীয়া বেটছমেনগৰাকীয়ে 43 টা বলত 118 ৰাণৰ ইনিংছ গঢ়িবলৈ সক্ষম হৈছিল ৷ আনহাতে, 2017 চনৰ 29 নৱেম্বৰত বাংলাদেশৰ বিৰুদ্ধে দক্ষিণ আফ্ৰিকাৰ বেটছমেন ডেভিদ মিলাৰে 35 বলত শতক অৰ্জন কৰিছিল ৷
শ্ৰীলংকাৰ বিৰুদ্ধে কে. এল. ৰাহুলেও 49 বলত 89 ৰাণৰ ইনিংছ গঢ়িছিল ৷ ইয়াৰ ফলত ভাৰতীয় দলে 20 অ'ভাৰত সংগ্ৰহ কৰিছিল 260/5 ৷ ভাৰতে গঢ়া বিশাল ৰাণৰ সীমা অনুসৰণ কৰি শ্ৰীলংকাই 18 অ'ভাৰত কেৱল 172 ৰাণ সংগ্ৰহ কৰি 88 ৰাণত পৰাজয় স্বীকাৰ কৰিছিল ৷
সীমিত অ'ভাৰৰ মেচৰ ভাৰতৰ সহ-অধিনায়ক ৰোহিত হৈছে টি-20 ক্ৰিকেটত সৰ্বাধিক ৰাণ সংগ্ৰহ কৰা দ্বিতীয়গৰাকী ক্ৰিকেটাৰ ৷ 104 খন মেচৰ পৰা তেওঁ সংগ্ৰহ কৰিছে 2,773 ৰাণ ৷ ইয়াত আছে চাৰিটাকৈ শতক ৷ আনহাতে, শীৰ্ষ স্থানত আছে ভাৰতৰ অধিনায়ক বিৰাট কোহলী ৷ 85 খন মেচত তেওঁ সংগ্ৰহ কৰিছে 2,928 ৰাণ ৷
লগতে পঢ়ক :মই নিয়মাৱলী সন্দৰ্ভত অৱগত নাছিলোঃ গ্ৰেপ্তাৰৰ পিছত ৰাইনাৰ প্ৰতিক্ৰিয়া
