একেটা ভ্ৰমণতে তিনিটা ফৰমেটত অভিষেক ঘটোৱা প্ৰথমগৰাকী ভাৰতীয় নটৰাজন

অষ্ট্ৰেলিয়াৰ বিৰুদ্ধে তৃতীয় এদিনীয়া মেচৰ জৰিয়তে আন্তৰাষ্ট্ৰীয় ক্ৰিকেটত অভিষেক ঘটাইছিল টি নটৰাজনে ৷

স্পৰ্টছ ডেস্ক, 15 জানুৱাৰী : একেটা ভ্ৰমণতে ক্ৰিকেটৰ তিনিওটা ফৰমেটতে আন্তৰাষ্ট্ৰীয় অভিষক ঘটোৱা প্ৰথমগৰাকী ভাৰতীয় ক্ৰিকেটাৰ হিচাপে পৰিগণিত হৈছে পেচাৰ থাংগাৰাছু নটৰাজন ৷ 29 বৰ্ষীয় তামিলনাডুৰ পেচাৰগৰাকীয়ে অষ্ট্ৰেলিয়াৰ বিৰুদ্ধে চতুৰ্থ টেষ্টৰ জৰিয়তে টেষ্ট মেচত আত্মপ্ৰকাশ ঘটায় ৷

কানবেৰাত 2 ডিচেম্বৰত অষ্ট্ৰেলিয়াৰ বিৰুদ্ধে তৃতীয় এদিনীয়াত আন্তৰাষ্ট্ৰীয় মেচত অভিষেক ঘটাইছিল নটৰাজনে ৷ সেই মেচত 13 ৰাণত জয় লাভ কৰিছিল ভাৰতে ৷ 10 অ'ভাৰত 70 ৰাণ দি তেওঁ সংগ্ৰহ কৰিছিল 2 টাকৈ উইকেট ৷

ইয়াৰ পাচতে টি-20 মেচত 2-1 ত ছিৰিজ দখল কৰা ভাৰতীয় দলৰ জয়ত গুৰুত্বপূৰ্ণ ভূমিকা গ্ৰহণ কৰিছিল নটৰাজনে ৷ টি-20 ছিৰিজত তেওঁ দখল কৰিছিল ছয়টা উইকেট ৷

আইচিচিয়ে এক টুইটাৰৰ জৰিয়তে কয়, "টেষ্ট ক্ৰিকেটলৈ আদৰণি... একেটা ভ্ৰমণতে ক্ৰিকেটৰ তিনিওটা ফৰমেটতে আন্তৰাষ্ট্ৰীয় অভিষক ঘটোৱা প্ৰথমগৰাকী ভাৰতীয় ক্ৰিকেটাৰ হিচাপে পৰিগণিত হৈছে পেচাৰ থাংগাৰাছু নটৰাজন ৷"

লগতে পঢ়ক :চতুৰ্থ টেষ্ট : প্ৰথম দিনাৰ অন্তত অষ্ট্ৰেলিয়াৰ সংগ্ৰহ 274/5