স্পৰ্টছ ডেস্ক, 24 জুনঃ মই কৰ'ণা পজিটিভ নহয় । এদিন পিচতেই কৰ'ণা পজিটিভ ওলোৱা খবৰ খণ্ডন মহম্মদ হাফিজৰ । মঙলবাৰে পাকিস্তান ক্ৰিকেট ব'ৰ্ডে সাতগৰাকী ক্ৰিকেটাৰ কৰ'ণা পজিটিভ পোৱা বুলি ঘোষণা কৰাৰ পাচতেই হাফিজে বুধবাৰে নিজকে কৰ'ণা পজিটিভ নহয় বুলি উল্লেখ কৰে ।
হাফিজে নিজাববীয়াকৈ নিজৰ লগতে পৰিয়ালৰ কৰ'ণাৰ পৰীক্ষণ কৰাৰ পাচত ফলাফল নিগেটিভ পোৱা বুলি বুধবাৰে টুইট যোগে সদৰি কৰে ।
হাফিজে কয়, মঙলবাৰে পিচিবিৰ দ্বাৰা কৰা কৰ'ণা টেষ্টত মোক পজিটিভ পোৱা গৈছিল । মই মোৰ আত্ম সন্তুষ্টিৰ বাবে মোৰ আৰু মোৰ পৰিয়ালৰ পুনৰ টেষ্ট কৰোৱাইছিলো । যাৰ ফলাফল নিগেটিভ পোৱা গৈছে । আল্লাই আমাক সুৰক্ষিত ৰাখক ।
উল্লেখ্য় যে, মঙলবাৰে আক্ৰান্ত হোৱা খেলুৱৈ সকলৰ ভিতৰত আছিল ফখৰ জামান, ইমৰাণ খান, মহম্মদ হাফিজ, কাছিফ ভট্টী, মহম্মদ ৰিজৱান, মহম্মদ হাছনেন আৰু ৱাহাব ৰিয়াজ । আনহাতে সোমবাৰে হায়দাৰ আলী, হাৰিছ ৰওফ আৰু ছাদাব খানৰ দেহত পোৱা গৈছিল কৰ'ণা ভাইৰাছৰ অৱস্থিতি ।