স্পৰ্টছ ডেস্ক, 12 ফেব্ৰুৱাৰী : 19 বছৰ অনুৰ্ধ বিশ্বকাপ ক্ৰিকেটত বাংলাদেশ দলৰ সৈতে ভাৰতীয় দলে হতাহতিত লিপ্ত হোৱাত অসন্তুষ্ট হৈ পৰিছে ভাৰতীয় ক্ৰিকেটৰ প্ৰাক্তন অধিনায়ক কপিল দেৱ আৰু মহম্মদ আজাহাৰ উদ্দিন ৷ সেয়েহে হতাহতিৰ সৈতে জড়িত খেলুৱৈসকলক শাস্তি প্ৰদানৰ বাবে বিচিচিআইক আহ্বান জনাইছে দুই প্ৰাক্তন খেলুৱৈয়ে ৷
দেওবাৰে চেনৱেছ পাৰ্কত অনুষ্ঠিত মেচত ডাকৱৰ্থ লিৱিছ পদ্ধতিৰে বাংলাদেশে ভাৰতক তিনি উইকেটত পৰাস্ত কৰাৰ পাচতে দুয়ো দলৰ খেলুৱৈসকলে বাকবিতণ্ডাত লিপ্ত হোৱাৰ লগতে হতাহতি কৰিছিল ৷
এই সম্পৰ্কত কপিল দেৱে কয়, "এক উদাহৰণ স্থাপনৰ বাবে বিচিচিআইয়ে খেলুৱৈসকলক কঠোৰ শাস্তি প্ৰদান কৰিব লাগে ৷ ক্ৰিকেটৰ অৰ্থ এইটো নহয় যে, বিৰোধীক অপমান কৰিব লাগে ৷ এই ঘটনাৰ ফলত বিচিচিআইয়ে খেলুৱৈসকলৰ বিৰুদ্ধে কঠোৰ শাস্তিৰ ব্যৱস্থা গ্ৰহণ কৰিব লাগে ৷"
তেওঁ লগতে কয়, "মই ক্ৰিকেটত আক্ৰমণাত্মক মনোভাৱক আদৰণি জনাওঁ, ইয়াত কোনো ভুল নাই ৷ কিন্তু এয়াও সীমিত পৰিমাণত হ'ব লাগে ৷ প্ৰতিযোগিতাৰ নামত শালীনতাৰ সীমা পাৰ কৰা উচিত নহয় ৷ এনেকুৱা অপ্ৰীতিকৰ ঘটনা খেলপথাৰত প্ৰদৰ্শন কৰাটো অগ্ৰহণযোগ্য ৷"