ভাৰত - ৱেষ্ট ইণ্ডিজ প্ৰথম টেষ্ট : ৰাহানেৰ 81 ৰাণ সংগ্ৰহ

ভাৰত - ৱেষ্ট ইণ্ডিজ প্ৰথম টেষ্টৰ প্ৰথম দিনৰ খেলৰ অন্তত ভাৰতীয় ক্ৰিকেট দলে 6 উইকেট হেৰুৱাই 203 ৰাণ সংগ্ৰহ কৰিছে ৷ ভাৰতৰ হৈ ৰাহানেই 81 সুন্দৰ প্ৰদৰ্শন আগবঢ়াইছে ৷

স্পৰ্টছ ডেস্ক, 23 আগষ্ট : আজিংকা ৰাহানেৰ 81 ৰাণৰ সুন্দৰ প্ৰদৰ্শনৰ জৰিয়তে ভাৰত - ৱেষ্ট ইণ্ডিজৰ প্ৰথম টেষ্টৰ প্ৰথম দিনা 6 উইকেট হেৰুৱাই 203 ৰাণ সংগ্ৰহ কৰিছে ভাৰতীয় দলে ৷ টছত জয়ী হৈ ৱেষ্ট ইণ্ডিজ দলে বলিঙৰ সিদ্ধান্ত গ্ৰহণ কৰে ৷ দূৰ্দান্ত বলিঙেৰে ভাৰতৰ 25 ৰাণত 3 টা উইকেট দখল কৰে ৱেষ্ট ইণ্ডিজ দলে ৷ কে. এল. ৰাহুল আৰু মায়ংক আগৰৱালে অ'পেনিং কৰিবলৈ নামে যদিও দুৰ্বল বেটিং প্ৰদৰ্শন আগবঢ়ায় ৷

আগৰৱালে 5 ৰাণ কৰি আউট হোৱাৰ লগতে চেতেশ্বৰ পূজাৰাই 2 আৰু বিৰাট কোহলীয়ে 9 ৰাণ কৰে ৷ ইয়াৰ পাছতে চতুৰ্থ উইকেটৰ যুটিত ৰাহানে আৰু ৰাহুলে 68 ৰাণৰ ইনিংছ গঢ়িবলৈ সক্ষম হয় ৷ দলক 44 ৰাণৰ ইনিংছ উপহাৰ দি স্পীনাৰ ৰ'ষ্টন ছেজৰ হাতত উইকেট হেৰুৱায় ৰাহুলে ৷

ভাৰত - ৱেষ্ট ইণ্ডিজ প্ৰথম টেষ্ট

ৰাহুলৰ পাছতে হনুমা বিহাৰীয়ে ৰাহানেৰ সৈতে পাঁচ উইকেটৰ যুটীত 82 ৰাণৰ ইনিংছ গঢ়ে ৷ প্ৰথম দিনৰ খেলৰ অন্তত ঋষভ পন্ত আৰু ৰবীন্দ্ৰ জাদেজাই ক্ৰমে 20 আৰু 3 ৰাণত বেটিং কৰি আছে ৷ ৱেষ্ট ইণ্ডিজৰ হৈ কেমাৰ ৰ'ছে তিনিটা, গেব্ৰিয়েলে দুটা আৰু ছেজে এটাকৈ উইকেট দখল কৰিছে ৷