স্পৰ্টছ ডেস্ক, 19 জানুৱাৰী : ভাৰত আৰু অষ্ট্ৰেলিয়াৰ মাজৰ তিনিখনীয়া মেচৰ এদিনীয়া শৃংখলাৰ অন্তিম তথা চূড়ান্ত মেচ দেওবাৰে বাংগালুৰুৰ এম. চিন্নস্বামী ষ্টেডিয়ামত অনুষ্ঠিত হ'ব ৷ আইচিচি এদিনীয়া ৰেংকিঙৰ শীৰ্ষৰ দুয়োটা দলে প্ৰথম আৰু দ্বিতীয় মেচত নিজৰ নিজৰ শক্তি প্ৰদৰ্শন কৰিবলৈ সক্ষম হয় ৷ চূড়ান্ত মেচত দুয়ো দলে জয়েৰে শৃংখলা দখল কৰাৰ চেষ্টা কৰিব ৷
ৱাংখেড়েত অনুষ্ঠিত প্ৰথম মেচত অষ্ট্ৰেলিয়া দলে ভাৰতক 10 উইকেটক পৰাভূত কৰিবলৈ সক্ষম হৈছিল ৷ এৰন ফিন্স আৰু ডেভিদ ৱাৰ্ণাৰৰ অপৰাজিত শতকৰ জৰিয়তে ভাৰতে গঢ়া 255 ৰাণৰ সীমা অষ্ট্ৰেলিয়াই অতি সহজে অতিক্ৰম কৰিবলৈ সক্ষম হয় ৷
এই পৰাজয়ৰ পাচতে ৰাজকোটত ভাৰতে সৱল প্ৰত্যাৱৰ্তন কৰে ৷ দলৰ শীৰ্ষ তিনি বেটছমেন শিখৰ ধাৱান, ৰোহিত শৰ্মা আৰু বিৰাট কোহলীয়ে ৰাণ সংগ্ৰহ কৰিবলৈ সক্ষম হোৱাৰ লগতে দলৰ জয়ত গুৰুত্বপূৰ্ণ ভূমিকা পালন কৰে ৷ এই মেচতে কে. এল. ৰাহুলেও 5 সংখ্যক স্থানত সুন্দৰ প্ৰদৰ্শন আগবঢ়ায় ৷