স্পৰ্টছ ডেস্ক, 25 জুনঃপাকিস্তানত COVID-১৯ ৰ সংক্ৰমণৰ ঘটনাৰ ওপৰত ভিত্তি কৰি পাকিস্তান ক্ৰিকেট দলৰ বাবে গৃহভূমিতকৈ ইংলেণ্ড অধিক সুৰক্ষিত বুলি কয় ৱেষ্ট ইণ্ডিজৰ প্ৰাক্তন ক্ৰিকেটাৰ মাইকেল হ'ল্ডিঙে ।
শেহতীয়াকৈ পাকিস্তান ক্ৰিকেট দলৰ দহগৰাকী কৈ খেলুৱৈ কৰ'ণা ভাইৰাছত আক্ৰান্ত হোৱা বুলি পাকিস্তান ক্ৰিকেট ব'ৰ্ডে সদৰি কৰাৰ পাচতেই এই প্ৰতিক্ৰিয়া প্ৰকাশ প্ৰাক্তন ক্ৰিকেটাৰগৰাকীৰ । ইংলেণ্ডৰ ভ্ৰমণৰ পূৰ্বে পাকিস্তানৰ 29 জনীয়া সদস্য়ৰ দলটোৰ কৰ'ণা পৰীক্ষণ কৰাইছিল পিচিবিয়ে । অহা 28 জুনত ইংলেণ্ডলৈ ৰাওনা হোৱাৰ কথা পাকিস্তান ক্ৰিকেট দলটো ।
পিচিবিৰ দ্বাৰা প্ৰকাশ কৰা সংক্ৰমিত খেলুৱৈৰ তালিকাত মহম্মদ হাফিজৰ নাম অন্তৰ্ভুক্ত আছিল যদিও খেলুৱৈগৰাকীয়ে নিজাববীয়াকৈ কৰা পৰীক্ষাত তেওঁৰ ফলাফল বুধবাৰে নিগেটিভ অহা বুলি উল্লেখ কৰিছিল খেলুৱৈগৰাকীয়ে ।
হ'ল্ডিঙে এক ইউটিউভ চেনেলত পাকিস্তানত বৰ্তমান সময়ত যি হৈ আছে, তাৰ তুলনাত ইংলেণ্ড সুৰক্ষিত বুলি কয় । উল্লেখ্য় যে, ইংলেণ্ডত অহা 4 জুলাইৰ পৰা নিষেধাজ্ঞা সমূহত শিথিলিতা প্ৰদান কৰা হ'ব । আনহাতে অহা 8 জুলাইৰ পৰা ৱেষ্ট ইণ্ডিজ আৰু ইংলেণ্ডৰ মাজত টেষ্ট শৃংখলাৰো আয়োজন কৰা হ'ব ।
পাকিস্তান ক্ৰিকেট দলটোৱে অহা আগষ্ট-ছেপ্তেম্বৰ মাহত তিনিখন টি-20 আৰু তিনিখন টেষ্ট মেচৰ শৃংখলাত ইংলেণ্ডৰ বিৰুদ্ধে অৱতীৰ্ণ হ'ব । পাকিস্তান দলটোৰ খেলুৱৈৰ কৰ'ণা পজিটিভ পোৱাৰ পিচতেই এই ভ্ৰমণক লৈ অনিশ্চয়তাৰ সৃষ্টি হৈছে যদিও পাকিস্তান ক্ৰিকেটৰ CEO ৱাছিম খানে ইংলেণ্ডলৈ পাকিস্তান দলৰ ভ্ৰমণৰ কাৰ্যসূচী বাহাল থকাৰ ইংগিত দিয়ে ।
