মেঘালয়ৰ ক্ৰিকেটাৰৰ দ্ৰুততম অৰ্ধশতক

চৈয়দ মুস্তাক আলী টি-20 ট্ৰফীত মেঘালয়ৰ খেলুৱৈৰ দুৰ্দান্ত বেটিং ৷ টুৰ্ণামেণ্টৰ দ্ৰুততম অৰ্ধশতক অৰ্জন অভয় নেগীৰ ৷

স্পৰ্টছ ডেস্ক, 17 নৱেম্বৰ:মেঘালয় আৰু মিজোৰামৰ মাজত অনুষ্ঠিত হোৱা চৈয়দ মুস্তাক আলী টি-20 ট্ৰফীত মেঘালয়ৰ খেলুৱৈৰ দুৰ্দান্ত বেটিং ৷ টুৰ্ণামেণ্টৰ দ্ৰুততম অৰ্ধশতক অৰ্জন কৰিলে অভয় নেগীয়ে ৷ 14 টা বলত অৰ্ধশতক কৰি অভিলেখ ৰচিলে মেঘালয়ৰ প্ৰতিভাৱান খেলুৱৈগৰাকীয়ে ৷ ইয়াৰ লগে-লগে ভাৰতত দ্ৰুততম অৰ্ধশতক অৰ্জন কৰাৰ তালিকাত কে.এল ৰাহুলৰ অভিলেখৰ সমপৰ্যায় লাভ কৰাৰ বিপৰীতে ভংগ কৰে ৰবিন উথাপ্পাৰ অভিলেখ ৷ অভয় নেগীৰ দুৰ্দান্ত ইনিংছত থাকে 6 টা আকাশলম্বী ছয়ৰ লগতে 2 টা চাৰি ৷ তেওঁৰ বিস্ফোৰক ইনিংছৰ ফলতেই মেঘালয়ে চাৰি উইকেটৰ বিনিময়ত 207 ৰান কৰিবলৈ সক্ষম হয় ৷

ইপিনে 2018 আই পি এলত কিংছ ইলেভেন পাঞ্জাৱৰ হৈ ৰাহুলে গঢ়িছিল ভাৰতত দ্ৰুততম অৰ্ধশতক ৷ অৱশ্যে আন্তঃৰাষ্ট্ৰীয় ক্ৰিকেটত আটাইতকৈ দ্ৰুততম অৰ্ধশতক অৰ্জন কৰা ভাৰতীয় খেলুৱৈ হৈছে যুৱৰাজ সিং ৷ 2007 বিশ্বকাপত ইংলেণ্ডৰ বিৰুদ্ধে 12 টা বলত এই কৃতিত্ব গঢ়িছিল প্ৰাক্তন খেলুৱৈগৰাকীয়ে ৷

লগতে চাওক-অন্ত পৰিল নেকি যুৱৰাজৰ আই পি এলৰ কেৰিয়াৰ !