নেশ্যনেল ডেস্ক,১৯ আগষ্ট :এছিয়া কাপ ২০২৩ৰ বাবে ভাৰতীয় দলে প্ৰস্তুতি আৰম্ভ কৰিছে । তাৰ অংশস্বৰূপে ভাৰতীয় ক্ৰিকেট দলে ৰাষ্ট্ৰীয় ক্ৰিকেট একাডেমীত এক সপ্তাহজোৰা শিবিৰৰ আয়োজন কৰিব । য'ত এছিয়া কাপৰ নিৰ্বাচিত খেলুৱৈসকলে অংশগ্ৰহণ কৰিব । পাকিস্তান আৰু শ্ৰীলংকাত অনুষ্ঠিত হ'বলগীয়া এছিয়া কাপ ক্ৰিকেটত খেলিবলৈ যাবলগীয়া খেলুৱৈসকলে এই শিবিৰত অংশগ্ৰহণ কৰিব বুলি ধাৰণা কৰা হৈছে । তাৰ প্ৰাকক্ষণত দিল্লীত ২১ আগষ্টত ভাৰতীয় ক্ৰিকেট দলৰ বাছনি সমিতিৰ বৈঠক অনুষ্ঠিত হ'ব । বৈঠকত ভাৰতীয় ক্ৰিকেট নিয়ন্ত্ৰণ ব'ৰ্ডৰ মুখ্য নিৰ্বাচক অজিত আগৰকাৰ আৰু ভাৰতীয় দলৰ অধিনায়ক ৰোহিত শৰ্মাইও অংশগ্ৰহণ কৰিব ।
সূত্ৰৰ মতে ৰোহিত শৰ্মাক এছিয়া কাপ খেলিবলৈ আৰু জয়ী হ'বলৈ তেওঁৰ পচন্দৰ দলটো দিয়া হ'ব । যাতে যোৱা বছৰ টি-২০ ফৰ্মেটত খেলা এছিয়া কাপত ভাৰতে পৰাজয় পাহৰিব পাৰে । যোৱাবাৰ ভাৰতে আনকি ফাইনেল খেলতো উপনীত হ'ব নোৱাৰিলে আৰু শ্ৰীলংকাই পাকিস্তানক পৰাস্ত কৰি এছিয়া কাপৰ খিতাপ অৰ্জন কৰিছিল ।
ভাৰতীয় ক্ৰিকেট দলে যোৱাবাৰৰ ভুলৰ পুনৰাবৃত্তি কৰিব নিবিচাৰে । সেয়েহে, দলটোৱে সকলো মুখ্য খেলুৱৈৰ সৈতে এছিয়া কাপত অংশগ্ৰহণ কৰিব । য'ত জ্যেষ্ঠ খেলুৱৈৰ লগতে যুৱ খেলুৱৈসকলকো দেখা যাব ।
ভাৰতীয় দল ঘোষণাত পলম হোৱাৰ অন্যতম কাৰণ হৈছে দল পৰিচালনা দলটোৱে যশপ্ৰীত বুমৰাহ, কে এল ৰাহুল আৰু শ্ৰেয়াছ আয়াৰৰ আঘাত আৰু আৰোগ্য হোৱাৰ বাবে অপেক্ষা কৰি আছিল । কিন্তু এতিয়া তিনিওগৰাকী খেলুৱৈ সম্পূৰ্ণৰূপে ফিট বুলি কোৱা হৈছে আৰু বেটিঙৰ কঠোৰ অনুশীলন অব্যাহত ৰাখিছে । যদি তেওঁলোকৰ ফিটনেছৰ স্তৰ সঠিক হয়, তেন্তে তিনিওগৰাকী খেলুৱৈক এছিয়া কাপত সুযোগ দিয়া হ'ব ।
অৱশ্যে, ফাষ্ট বলাৰ বুমৰাহে আয়াৰলেণ্ডৰ বিৰুদ্ধে আৰম্ভ হোৱা শৃংখলাত অধিনায়ক হিচাপে সুন্দৰ প্ৰদৰ্শন দেখুৱাইছে । শৃংখলাটোৰ প্ৰথমখন খেলত তেওঁৰ বলিং দক্ষতা আকৰ্ষণীয় হৈছে । প্ৰথম খন মেচতে প্ৰথম অভাৰতে তেওঁ দুটা উইকেট দখল কৰিছে । উন্নত বলিঙৰ প্ৰদৰ্শনৰ বাবে তেওঁক প্লেয়াৰ অফ দ্য মেচৰ খিতাপো দিয়া হৈছে ।এছিয়ান ক্ৰিকেট কাউন্সিলৰ (এচিচি) সভাপতি জয় শ্বাহে ১৯ জুলাইত এছিয়া কাপ ২০২৩ৰ সময়সূচী ঘোষণা কৰাৰ সময়ত কৈছিল যে প্ৰতিযোগিতাখন ৩০ আগষ্টত আৰম্ভ হ'ব । ইয়াৰ প্ৰথমখন খেল পাকিস্তানত হ'ব । পাকিস্তানত ৪ খন আৰু শ্ৰীলংকাত ৯ খন খেল অনুষ্ঠিত হ'ব । ভাৰতৰ প্ৰথমখন খেল ২ ছেপ্টেম্বৰত পাকিস্তানৰ বিৰুদ্ধে হ'ব ।
লগতে পঢ়ক :Virat Kohli batting order : '৪ নম্বৰত বেটিং কৰিব লাগিব বিৰাট কোহলীয়ে'-ৰবি শাস্ত্ৰী
