স্পৰ্টছ ডেস্ক, 29 জুলাই : ক'ভিড-19 মহামাৰীৰ ফলত বিশ্ব বেডমিন্টন ফেডাৰেছনে (BWF) বাতিল কৰিছে চাৰিখন বৃহৎ প্ৰতিযোগিতা ৷ প্ৰতিযোগিতাসমূহ হৈছে টাইপেই অ'পেন, কোৰিয়া অ'পেন, চাইনা অ'পেন আৰু জাপান অ'পেন ৷
উল্লেখ্য যে, 1 ৰ পৰা 6 ছেপ্টেম্বৰলৈ টাইপেই অ'পেন আৰু 8 ৰ পৰা 13 ছেপ্টেম্বৰলৈ কোৰিয়া অ'পেন অনুষ্ঠিত কৰাৰ দিন ধাৰ্য কৰা হৈছিল ৷ আনহাতে, চাইনা অ'পেন 15-20 ছেপ্টেম্বৰ আৰু জাপান অ'পেন 22-27 ছেপ্টেম্বৰত অনুষ্ঠিত কৰাৰ দিন ধাৰ্য কৰা হৈছিল ৷
BWF ৰ সাধাৰণ সম্পাদক থমাছ লুন্দে কয়, "ক্ৰীড়াবিদ, দৰ্শক, ভলন্টিয়াৰ আৰু এচ'ছিয়েচনৰ সদস্যসকলৰ স্বাস্থ্যৰ প্ৰতি লক্ষ্য ৰাখি এই প্ৰতিযোগিতাসমূহ বাতিল কৰাৰ সিদ্ধান্ত গ্ৰহণ কৰা হৈছে ৷ প্ৰতিযোগিতাসমূহ বাতিল কৰি আমি অতিকৈ দুঃখিত হৈছো, কিন্তু এই সময়ত সকলোৰে স্বাস্থ্যৰ প্ৰতি গুৰুত্ব প্ৰদান কৰাটো অতিকৈ গুৰুত্বপূৰ্ণ ৷"