হিন্দী ধাৰাবাহিকৰ মুখ্য ভূমিকাত অসমীয়া জীয়ৰী

মাৰ্ঘেৰিটাৰ কংগন বৰুৱা নাঙ্গীয়াই অভিনয় কৰিছে চ’নি টিভিৰ জনপ্ৰিয় ধাৰাবাহিক বেহদ-2 ৰ এটা মুখ্য চৰিত্ৰত

মাৰ্ঘেৰিটা,3 জানুৱাৰীঃৰাজ্যখনৰ বহু প্ৰতিভাই নিজ অধ্যৱসায় আৰু সাধনাৰ জৰিয়তে ৰাষ্ট্ৰীয় পৰ্যায়ত সুখ্যাতি অৰ্জন কৰাৰ লগতে নিজৰ এক সুকীয়া স্থান দখল কৰিবলৈ সক্ষম হৈছে ৷ শেহতীয়াকৈ মাৰ্ঘেৰিটাৰ এগৰাকী যুৱতীয়ে নিজৰ প্ৰতিভাৰে হিন্দী ধাৰাবাহিকত মুখ্য ভূমিকাত অভিনয় কৰাৰ সুবিধা লাভ কৰি ৰাজ্যলৈ কঢ়িয়াই আনিছে গৌৰৱ । চ’নি টিভিৰ জনপ্ৰিয় ধাৰাবাহিক বেহদ-2 ৰ এটা মুখ্য চৰিত্ৰত অভিনয় কৰিছে মাৰ্ঘেৰিটাৰ কংগন বৰুৱা নাঙ্গীয়াই ৷ ধাৰাবাহিকখনত অনন্যা নামৰ মূল নাৰী চৰিত্ৰটোত অভিনয় কৰিছে মাৰ্ঘেৰিটাৰ গৌতম বৰুৱা নাঙ্গীয়া আৰু মনিকা বৰুৱা নাঙ্গীয়াৰ একমাত্ৰ কন্যা কংগন বৰুৱা নাঙ্গীয়াই । সৰুৰে পৰা অভিনয়ৰ সৈতে জড়িত কংগনে অনুপম খেৰৰ ওচৰত ছমাহ অভিনয়ৰ পাঠ্যক্ৰম গ্ৰহণ কৰিছিল । দেৱীচৰণ বৰুৱা তথা জাহ্নু বৰুৱাৰ পৰিয়ালৰ সন্তান কংগনে জীৱনৰ প্ৰথমটো বিজ্ঞাপনত চুপাৰষ্টাৰ শ্বাহৰুখ খানৰ সৈতে অভিনয় কৰিছিল । নতুন বৰ্ষৰ উদযাপনৰ বাবে মাত্ৰ দুটা দিনৰ বাবে ঘৰলৈ অহা কংগনে চিৰিয়েলখনৰ এশটা খণ্ডৰ বাবে চুক্তিবদ্ধ হৈছে ।ইতিমধ্যে ২৭ টা খণ্ডৰ শ্বুটিং আৰু ২৩ টা খণ্ড সম্প্ৰচাৰ সম্পূৰ্ণ হৈছে ধাৰাবাহিকখনৰ ৷