আজিৰে পৰা অনলাইন চাব পাৰিব অসমীয়া ছবি বৰনদী ভটিয়ায়

লক্ ডাউনৰ বাবে বন্ধ হৈ আছে ছবিগৃহসমূহ কিন্তু তাৰ বাবে যেন ৰাইজে মনোৰঞ্জনৰ পৰা আঁতৰি থাকিব লগা নহয় তাৰ বাবে ব্যৱস্থা কৰিছে ছবি নিৰ্মাতাসকলে ৷ হিন্দী ছবি, ছিৰিজৰ দৰেই অসমীয়া ছবিসমূহো অনলাইন চোৱাৰ সুবিধা কৰি দিছে ছবি নিৰ্মাতাসকলে ৷ শেহতীয়াকৈ দৰ্শকৰ বহু সমাদৃত অসমীয়া ছবি 'বৰনদী ভটিয়ায়' অনলাইন চোৱাৰ সুবিধা কৰি দিছে ছবিখনৰ পৰিচালকগৰাকীয়ে ৷

গুৱাহাটী,1 মে'ঃমাজুলীৰ পটভূমিত অনুপম কৌশিক বৰাৰ কাহিনী, পৰিচালনা আৰু প্ৰযোজনাৰে নিৰ্মিত অসমীয়া ছবি 'বৰনদী ভটিয়ায়' মুক্তি লাভ কৰা প্ৰায় এবছৰৰ পিছতো দৰ্শকৰ সমাদৰ লাভ কৰিবলৈ সক্ষম হৈ আছে । 2019 বৰ্ষৰ 3 মে'ত ছবিগৃহলৈ অহা ছবিখনে চতুৰ্থ সপ্তাহ পৰ্যন্ত অসমৰ ৰাইজৰ মৰম বুটলিবলৈ সক্ষম হৈছিল ।

ছবিগৃহত চাই হেঁপাহ নপলোৱা ছবিখন পুনৰ চাবৰ বাবে অনুৰোধ আহিল দৰ্শকৰ পৰা ৷ অসম তথা অসমৰ বাহিৰৰ পৰাও বহু চিনেমাপ্ৰেমীয়ে ছ'চিয়েল মিডিয়াত অনুৰোধ জনোৱাৰ পৰিপ্ৰেক্ষিতত সাম্প্ৰতিক পৰিস্থিতিত সকলোৱে ঘৰতে বহি বৰনদী ভটিয়ায় ছবিখন অনলাইন চোৱাৰ ব‍্যৱস্থা কৰি দিছে ছবিখনৰ পৰিচালক অনুপম কৌশিক বৰাই।

আনহাতে ছবিখনৰ মৌকণ চৰিত্ৰত অভিনয় কৰা অভিনেত্ৰী দৰথী ভৰদ্বাজে ছবিখনক দর্শকে মৰম দিয়াৰ বাবে ধন্যবাদ জ্ঞাপন কৰিছে। অসমৰ দৰ্শকৰ লগতে অসমৰ বাহিৰৰ দৰ্শকৰ বাবে ছবিখন অনলাইনত উপভোগ কৰিবলৈ আগবঢ়াই দিবলৈ পায় স্বাভাৱিকতে সুখী ছবিখনৰ নায়িকা গৰাকী ৷

১ মে' ২০২০ শুকুৰবাৰে সন্ধিয়া ৬ বজাৰ পৰা ইচ্ছুক দৰ্শকে www.moviesaints.comত চাব পাৰিব ছবিখন। সবিশেষ জানিবলৈ চাব পাৰে বৰনদী ভটিয়ায়ৰ ফেচবুক পেজ www.facebook.com/bornodibhotiai।