হায়াত হাস্পতালত কঁকাল ভাঙি বিহু নাচিলে মাধুৰিমা চৌধুৰী আৰু চেতনা দাসে

হায়াত হাস্পতালৰ চৌহদত ৰঙালীৰ ৰং ৰইচ ৷ জনপ্ৰিয় কণ্ঠশিল্পী অনুপম শইকীয়াৰ লগতে অসমীয়া ছবি জগতৰ জেষ্ঠ অভিনেত্ৰী মাধুৰীমা চৌধুৰী আৰু চেতনা দাসৰ লগতে হাস্পতালৰ ৰোগী কৰ্মচাৰীয়ে উদযাপন কৰিলে প্ৰাক ৰঙালী উৎসৱ ৷

গুৱাহাটী, 10 এপ্ৰিলঃ ৰাজ্যত এফালে লোকসভা নিৰ্বাচনৰ ঢৌ, আনফালে আৱেগৰ ব’হাগীক আদৰিবলৈ অপেক্ষাৰত অসমবাসী ৷ এনেসময়তে বুধবাৰে হায়াত হাস্পতালৰ উদ্যোগত হাস্পতালখনৰ চৌহদত হায়াত ইনষ্টিটিউট অৱ নাৰ্চিং এডুকেশ্যন, হায়াত প্ৰতিবেশী সমাজৰ সহযোগত হাস্পতালৰ ৰোগী আৰু কৰ্মচাৰীৰ সৈতে ৰঙালীক আদৰিলে অসমৰ জনপ্ৰিয় কণ্ঠশিল্পী অনুপম শইকীয়া, লগতে অভিনেত্ৰী মাধুৰীমা চৌধুৰী আৰু চেতনা দাসে ৷ কণ্ঠশিল্পী অনুপম শইকীয়াৰ বিহু গীতত বুধবাৰে মুখৰিত হ’ল হাস্পতাল চৌহদ ৷ কন্ঠশিল্পীগৰাকীৰ গীতৰ তালে তালে অসমীয়া ছবি জগতৰ জেষ্ঠ অভিনেত্ৰী মাধুৰীমা চৌধুৰী আৰু চেতনা দাসৰো আপোন ভোলা নৃত্য ৷ ইফালে কৌতুক অভিনেত্ৰী চেতনা দাসৰ কৌতুকে উপস্থিত সকলোকে আনন্দ দিয়ে ৷ তিনিওগৰাকী শিল্পীৰ গীত আৰু নৃত্যত বাৰুকৈয়ে উৎফুল্লিত হৈ পৰে ৰোগীৰ লগতে কৰ্মচাৰীসকলো ৷ এই অনুষ্ঠানৰ আঁত ধৰে ডাঃ হেমজিৎ তালুকদাৰে ৷ বুধবাৰে দিনৰ ভাগত অনুষ্ঠিত এই প্ৰাক ৰঙালী অনুষ্ঠানত উপস্থিত থাকে হাস্পতালখনৰ সঞ্চালক অয়স্কান্ত চক্ৰৱৰ্তী, হায়াত ইনষ্টিটিউট অৱ নাৰ্চিং এডুকেশ্যনৰ অধ্যক্ষা দীপালি দাস, হায়াত হাস্পতালৰ মহাপ্ৰৱন্ধক পৰাগজ্যোতি দত্ত ৷

উল্লেখ্য যে, প্ৰত্যেক বছৰে হায়াত হাস্পতালে হাস্পতালখনৰ চৌহদত উদযাপন কৰি আহিছে প্ৰাক ৰঙালী অনুষ্ঠান ৷ ৰোগী তথা অভিভাৱক সকলৰ সুবিধাৰ্থে অনুষ্ঠিত কৰি আহিছে এই অনুষ্ঠান ৷ এই অনুষ্ঠানত অসমীয়া ছবি জগতৰ তিনিওগৰাকী শিল্পীয়ে ৰোগীক বিতৰণ কৰে ৰঙালী বিহুৰ পিঠা-পনা ৷ ৰঙালীৰ ৰং ৰইচৰ মাজতে শিল্পীসকলে উপস্থিত সকলোকে আগন্তক লোকসভা নিৰ্বাচনত সকলোকে অংশগ্ৰহণ কৰাৰ লগতে বিবেক ভোট প্ৰদানৰ বাবে আহ্বান জনায় ৷