মুক্তি পালে আয়ুষ্মান খুৰাণাৰ আগন্তুক ছবি "শুভ মংগল জ্যাদা সাৱধান"ৰ ট্ৰেইলাৰ

সমকামিতাৰ ওপৰত নিৰ্মিত ছবি শুভ মংগল জ্যাদা সাৱধানত এইবাৰ পৃথক ৰূপত দেখিবলৈ পোৱা যাব আয়ুষ্মান খুৰাণাক ৷

চিটাৰা ডেস্ক,20 জানুৱাৰীঃ সোমবাৰে মুক্তি পালে আয়ুষ্মান খুৰাণা অভিনীত ছবি শুভ মংগল জ্যাদা সাৱধানৰ ট্ৰেইলাৰ ৷ 2 মিনিট 41 ছেকেণ্ডৰ ভিডিঅ'টোত আয়ুষ্মান খুৰাণাৰ সৈতে দেখিবলৈ পোৱা গ'ল গজৰাজ ৰাও আৰু নীনা গুপ্তাক ৷

ছবিখনত 'ড্ৰিম গাৰ্ল' অভিনেতাগৰাকীয়ে এজন সমকামী পুৰুষৰ ৰূপত অভিনয় কৰিছে ৷ ট্ৰেইলাৰটোৱে দুজন পুৰুষৰ মাজৰ সম্বন্ধ আৰু পৰিয়ালবৰ্গই এই বিষয়ৰ ওপৰত দিয়া প্ৰতিক্ৰিয়াকে প্ৰকাশ কৰিছে ৷ সমকামিতা বিষয়টোৰ ওপৰত সমাজৰ প্ৰতিক্ৰিয়া আৰু সমকামী পুৰুষসকলৰ মনৰ অনুভৱৰ ওপৰত কেন্দ্ৰ কৰিয়েই ছবিখন নিৰ্মাণ কৰা হৈছে ৷ হিতেশ কেৱালাৰ দ্বাৰা নিৰ্দেশিত লগতে ভূষণ কুমাৰ, কৃষাণ কুমাৰ, আনন্দ এল ৰায় আৰু হিমাংশু শৰ্মাৰ দ্বাৰা সংযুক্তৰূপত নিৰ্মিত এই ছবিখন মুক্তি পাব 2020 বৰ্ষৰ 21 ফেব্ৰুৱাৰী তাৰিখে ৷

ৰাষ্ট্ৰীয় পুৰস্কাৰ প্ৰাপ্ত আয়ুস্মান খুৰাণাই ইতিমধ্যে বহুকেইখন ছবিত অভিনয় কৰিছে । অতি কম সময়ৰ ভিতৰতে নিজৰ প্ৰতিভাৰ জৰিয়তে খ্যাতি লাভ কৰা অভিনেতাগৰাকীয়ে তাৰো বধাই হো, বালা, ড্ৰিম গাৰ্ল, বিকি দোনাৰ, ডম লগাকে হায়চা, আৰ্টিকল ১৫ আদিৰ দৰে বহুকেইখন ছবিত অভিনয় কৰি দৰ্শকৰ হৃদয় জয় কৰিবলৈ সক্ষম হৈছে ৷ তেওঁৰ আগন্তুক ছবি শুভ মংগল জ্যাদা সাৱধানে কি ফল দেখুৱাবলৈ সক্ষম হ'ব সেয়া সময়তহে জানিব পৰা যাব ৷

লগতে পঢ়কঃ থলুৱা লোক কলা-সংস্কৃতিৰে জিলিকি উঠিব খেলো ইণ্ডিয়াৰ সামৰণি অনুষ্ঠান