চিটাৰা ডেস্ক,19 ফেব্ৰুৱাৰীঃ ছবি নিৰ্মাতা ৰোহিত চেট্টী সম্প্ৰতি ব্যস্ত সূৰ্যবংশীৰ শ্বুটিঙৰ কামত ৷ ছবি নিৰ্মাতা ৰোহিত চেট্টীয়ে 2010 চনত নিৰ্মাণ কৰিছিল সিংঘম ছবিখন ৷ সিংঘমত মুখ্য চৰিত্ৰত অভিনয় কৰিছিল জনপ্ৰিয় অভিনেতা অজয় দেৱগনে ৷ 2014 চনত সিংঘমৰ চিকুৱেল হিচাপে নিৰ্মাণ হৈছিল চিম্বা, য'ত মুখ্য চৰিত্ৰত অভিনয় কৰিছিল ৰণবীৰ সিঙে ৷
ৰোহিত চেট্টীয়ে এনেদৰে পুলিচধৰ্মী ছবিৰ চিকুৱেল আগবঢ়াই আপ্লুত কৰি আহিছে দৰ্শকসকলক ৷ সূৰ্যবংশী সন্দৰ্ভত ৰোহিত চেট্টীয়ে জনাই যে, তেওঁৰ এই ছবিখনৰ যোগেদি এক নতুন ধৰণৰ পুলিচৰ চৰিত্ৰ নিৰূপন কৰিছে ৷ নিৰ্দেশকজনে সূৰ্যবংশীৰ উপৰিও নিৰ্মাণ কৰিব চট্টে পে চট্টা ছবিখনৰ ৰিমেক ৷ তেওঁ কয়, "এই ৰিমেক সংস্কৰণ আন ছবিতকৈ সম্পূৰ্ণৰূপে পৃথক হ'ব ৷ আমি এই ক্ষেত্ৰত এতিয়াও কাম কৰি আছো ৷ ফাৰাহখানে ইয়াৰ স্ক্ৰিপ্ট লিখি আছে ৷ আমি খতৰৌ কে খিলাড়ী, সূৰ্যবংশী আৰু তাৰ পিছত এই প্ৰডাকচনৰ কাম কৰিব ৷"